ភ្នំពេញ ៖ ក្រុមការងារប្រចាំបញ្ជា ១១៧ នៃអគ្គស្នងការដ្ឋាននគរបាលជាតិ នៅវេលាម៉ោង២៤និង០៦នាទី ថ្ងៃទី០៣ ខែកុម្ភៈ ឆ្នាំ២០២២នេះ បានទទួលព័ត៌មានតាមរយៈប្រព័ន្ធទូរស័ព្ទទាន់ហេតុការណ៍ (Hotline) ១១៧ ពីឈ្មោះ សេង លឹម ភេទប្រុស បានប្រាប់ថា៖ គ្រោះថ្នាក់ចរាចរណ៍ រថយន្តម៉ាកសាំយ៉ុង ពណ៌ស ពាក់ផ្លាកលេខ ភ្នំពេញ ២T-៨១១៤ ដឹកអ្នកដំណើរ០៦នាក់ ស្រី០៣នាក់ ពីស្រុកគីរីសាគរ ឆ្ពោះទៅភ្នំពេញ បណ្ដាលឲ្យក្រឡាប់ធ្លាក់ផ្លូវដោយខ្លួនឯង រងរបួសស្រាល០២នាក់ ស្រី០១នាក់ នៅលើវិថីព្រឹទ្ធចារ្យសាយភូថង ស្ថិតនៅភូមិជីមាស ឃុំអណ្ដូងទឹក ស្រុកគីរីសាគរ ខេត្តកោះកុង ។
ក្រោយទទួលព័ត៌មានពីបុរសខាងលើរួចមក ក្រុមការងារប្រចាំបញ្ជា (១១៧) នៃអគ្គស្នងការដ្ឋាននគរបាលជាតិ លោកអនុសេនីយ៍ឯក ចាន់ ថន នៅវេលាម៉ោង២៤និង០៨នាទី បានបញ្ជូនព័ត៌មាននេះទៅលោកស្នងការរង ស សារ៉ាត់ ដើម្បីចុះអន្តរាគមន៍បន្ទាន់ ។
ជាលទ្ធផលនៅវេលាម៉ោង២៤និង២០នាទី សមត្ថកិច្ចមូលដ្ឋាន ដឹកនាំដោយលោកអធិការ យេន តូច បានចុះដល់កន្លែងកើតហេតុ ហើយបញ្ជូនជនរងគ្រោះទៅមន្ទីរពេទ្យ និងស្ទូចយករថយន្តមករក្សាទុកនៅអធិការដ្ឋាន រង់ចាំការដោះស្រាយតាមនីតិវិធី។
សមត្ថកិច្ចមូលដ្ឋានបានបញ្ជាក់ថា ៖ គ្រោះថ្នាក់ចរាចរណ៍នេះ បង្កឡើងដោយសារបើកបរក្នុងល្បឿនលឿន ហើយស្ថិតក្នុងស្ថានភាពស្រវឹង។ ករណីនេះត្រូវបានបញ្ជប់នៅម៉ោង០៣ និង៣៥នាទី ថ្ងៃទី០៣ ខែកុម្ភៈ ឆ្នាំ២០២២ ។
ដើម្បីសុំកិច្ចអន្តរាគមន៍ពីសមត្ថកិច្ចនគរបាលនៅគ្រប់កាលៈទេសៈ សូមទំនាក់ទំនងមកកាន់លេខទូរសព្ទទាន់ហេតុការណ៍ (Hotline) ១១៧ (ដោយឥតគិតថ្លៃ) យើងខ្ញុំនឹងរក្សាការសម្ងាត់ និងធានាសុវត្ថិភាពជូន និងពិនិត្យលទ្ធភាពដើម្បីអន្តរាគមន៍ដោះស្រាយជូនទាន់ពេលវេលា ៕
ប្រភព៖ អគ្គស្នងការដ្ឋាននគរបាលជាតិ
