ភ្នំពេញ ៖ ក្រុមការងារប្រចាំបញ្ជា ១១៧ នៃអគ្គស្នងការដ្ឋាននគរបាលជាតិ នៅវេលាម៉ោង១០និង៥៩នាទី ថ្ងៃទី០១ ខែកុម្ភៈ ឆ្នាំ២០២២នេះ បានទទួលព័ត៌មានតាមរយៈប្រព័ន្ធទូរស័ព្ទទាន់ហេតុការណ៍ (Hotline) ១១៧ ពីឈ្មោះ គឹម នី ភេទប្រុស មុខរបរបុគ្គលិកសណ្ឋាគារ ថាខាងសណ្ឋាគារដកហូតយកអត្តសញ្ញាណប័ណ្ណទុកមិនព្រមប្រគល់ជូនគាត់វិញ ស្ថិតនៅភូមិខ្សាច់ សង្កាត់៤ ក្រុងព្រះសីហនុ ខេត្តព្រះសីហនុ ។
ក្រោយទទួលព័ត៌មានពីបុរសខាងលើរួចមក ក្រុមការងារប្រចាំបញ្ជា (១១៧) នៃអគ្គស្នងការដ្ឋាននគរបាលជាតិ លោកវរសេនីយ៍ត្រី កែវ ចាន់ថន នៅវេលាម៉ោង១០និង៥៩នាទី បានបញ្ជូនព័ត៌មាននេះទៅលោកស្នងការរង ហួត ស្រី ដើម្បីចុះអន្តរាគមន៍បន្ទាន់ ។ បន្ទាប់មកសមត្ថកិច្ចមូលដ្ឋាន ដឹកនាំដោយលោកអធិការ តី វិសាល បានចុះដល់កន្លែងកើតហេតុ បានជូនជនរងគ្រោះទៅដាក់ពាក្យបណ្ដឹង រួចក៏ដឹកជនរងគ្រោះទៅជួបអ្នកទទួលខុសត្រូវសណ្ឋាគារ អ្នកទទួលខុសត្រូវសណ្ឋាគារបានបញ្ជាក់ថា៖ ខាងសណ្ឋាគារមិនបានដកយក អត្តសញ្ញាណប័ណ្ណរបស់ជនរងគ្រោះទេ គឺមិត្តភ័ក្រគាត់ម្នាក់ទៀតបានឈប់ធ្វើការមិនយកទៅបាត់ ជាមួយនឹងឯកសារមួយចំនួនទៀត រួចទាក់ទងលែងបាន។ បន្ទាប់មកជនរងគ្រោះក៏បានសំណូមពរភាគីសណ្ឋាគារសុំជួយគាត់ ៧០ដុល្លា ដើម្បីធ្វើអត្តសញ្ញាណប័ណ្ណថ្មី ហើយភាគីសណ្ឋាគារក៏យល់ព្រម ហើយជនរងគ្រោះក៏សុំដកពាក្យបណ្ដឹង។ ករណីនេះបានបញ្ជប់នៅវេលាម៉ោង ២០ និង១៣ ថ្ងៃទី០១ ខែកុម្ភះ ឆ្នាំ២០២២ ។
ដើម្បីសុំកិច្ចអន្តរាគមន៍ពីសមត្ថកិច្ចនគរបាលនៅគ្រប់កាលៈទេសៈ សូមទំនាក់ទំនងមកកាន់លេខទូរសព្ទទាន់ហេតុការណ៍ (Hotline) ១១៧ (ដោយឥតគិតថ្លៃ) យើងខ្ញុំនឹងរក្សាការសម្ងាត់ និងធានាសុវត្ថិភាពជូន និងពិនិត្យលទ្ធភាពដើម្បីអន្តរាគមន៍ដោះស្រាយជូនទាន់ពេលវេលា ៕
ប្រភព៖ អគ្គស្នងការដ្ឋាននគរបាលជាតិ
