ស្ទឹងត្រែង៖ កាលពីម៉ោងជាង៦ព្រឹក ថ្ងៃទី៤ ខែមករា ឆ្នាំ២០២២ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តដឹកទឹកសុទ្ធបានបើកបុកពីក្រោយរថយន្តដឹកទឹកកកបណ្តាលឱ្យបុរសម្នាក់កៀបជាប់ក្នុងកាប៊ីនរងរបួសបាក់ជើងម្ខាង នៅចំនុចផ្លូវជាតិលេខ៩ ក្នុងភូមិរាជានុកូល សង្កាត់ក្រុងស្ទឹងត្រែង។
បើតាមប្រភពពីសមត្ថកិច្ចបានអោយដឹងថាដំបូងរថយន្តដឹកទឹកកកបានឈប់លើផ្លូវក៏មានរថយន្តមួយគ្រឿងទៀតផ្លាកលេខភ្នំពេញ 2.AJ6919 បានបុកពីក្រោយពេញទំហឹងធ្វើឱ្យអ្នកដំណើរជិះជាប់តែកុងកៀបជាប់បាក់ជើងម្ខាង។ ជនរងគ្រោះឈ្មោះ ភ័ណ្ឌ ភេទ ប្រុស អាយុ ២០ឆ្នាំ រងរបួសបាក់ជើងឆ្វេងរស់នៅក្រុងស្ទឹងត្រែង។ ចំណែករថយន្តដឹកទឹកកក មានមនុស្ស២នាក់ឈ្មោះ ងោ ឌួន ភេទ ប្រុស អាយុ ២៣ឆ្នាំ និងឈ្មោះ ឌឹន ឧត្តម ភេទ ប្រុស អាយុ ២៣ ឆ្នាំ ទាំង២នាក់រស់នៅខេត្តស្ទឹងត្រែង៕
ប្រភព៖ សហការី
