ព្រះសីហនុ៖ នៅវេលាម៉ោងជាង៦ព្រឹកថ្ងៃទី០១ ខែមករា ឆ្នាំ២០២២ មានគ្រោះថ្នាក់ចរាចរណ៍ រថយន្តធំ២គ្រឿង បុកប៉ះគ្នាតាមផ្លូវជាតិលេខ៤ចំណុចលើស្ពានទឹកសាបក្នុងឃុំរាមស្រុកព្រៃនប់ខេត្តព្រះសីហនុ បណ្តាលឲ្យមនុស្សម្នាក់ស្លាប់និងម្នាក់ទៀតរបួសធ្ងន់។
សមត្ថកិច្ចឲ្យដឹងថា គ្រោះថ្នាក់ចរាចរណ៍នេះកើតឡើងរវាងរថយន្ត ០១ គ្រឿងម៉ាក DAEWOO (រថយន្ដដឹកសម្រាម) គ្មានពាក់ផ្លាកលេខ មានទិសដៅចេញពីក្រុងព្រះសីហនុ អ្នកបើកបរឈ្មោះ ឈាត ឈឿន ភេទប្រុស អាយុ២២ឆ្នាំ មុខរបរបើកបររថយន្ដដឹកសំរាម ពេលមកដល់ចំណុចខាងលើរថយន្ដបានរេចង្កូត មកខាងឆ្វេងដៃ រួចក៍បុកប៉ះនឹងរថយន្ដធំ ០១ គ្រឿងម៉ាក HYUNDAI ពណ៌សលាយខៀវ ពាក់ផ្លាកលេខព្រះសីហនុ 3A-5978 ទិសដៅផ្ទុយគ្នា បណ្តាលឲ្យអ្នកបើកបររថយន្ដដឹកសំរាមស្លាប់នៅនិងកន្លែងកើតហេតុ។ ចំណែក អ្នកបើកបររថយន្ដម៉ាក HYUNDAI(មិនទាន់ស្គាល់អត្តសញ្ញាណ) រងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យខេត្តព្រះសីហនុ។
ក្រោយកើតហេតុ សមត្ថកិច្ចបានចុះអន្តរាគមន៍ សម្រួលចរាចរណ៍ដែលកកស្ទះ និងចាត់ចែងដោះស្រាយបន្តតាមនិតិវិធី៕
ប្រភព៖ Huy Bunleng News
