ភ្នំពេញ៖ នៅម៉ោងប្រមាណ ១២ថ្ងៃត្រង់ ថ្ងៃទី២៥ ខែវិច្ឆិកា ឆ្នាំ២០២១នេះ មានករណីចាប់បានជនសង្ស័យកាច់សោរ.ក ម៉ូតូ ម្នាក់ ក្រោយម្នាក់ទៀតរត់គេចខ្លួនបាត់នៅចំណុចតាមបណ្តោយមហាវិថីព្រះស៊ីសុវត្ថិ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
បើយោងតាមប្រភពពីសមត្ថកិច្ចបានអោយដឹងថា ជនសង្ស័យមានឈ្មោះ សំ ញ៉ាញ់ ភេទប្រុសអាយុ២៦ឆ្នាំ ស្នាក់នៅបន្ទប់ជួល ក្នុងភូមិសាមគ្គីសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។ ចំណែកម្ចាស់ម៉ូតូ មានឈ្មោះ អ៊ុ ស្រី អាយុជាង៥០ឆ្នាំ ស្នាក់នៅម្តុំទីតាំងកើតហេតុ មានស្រុកកំណើតក្នុងខេត្តកណ្តាល។
ប្រភពដដែរបានបន្តទៀតថា នៅម៉ោងកើតហេតុខាងលើជនរងគ្រោះបានទុកម៉ូតូនៅចិញ្ចើមផ្លូវ ដើម្បីចុះទៅបត់ជើងតូច ស្រាប់តែជនសង្ស័យទាំង ២នាក់ បានធ្វើសកម្មកាច់សោរ.កម៉ូតូ ប៉ុន្តែមិនបានសម្រេចព្រោះត្រូវជនរងគ្រោះឃើញ ហើយក៏ស្រែកឆោឡោ អោយប្រជាពលរដ្ឋនៅទីតាំងខាងលើជួយចាប់បានម្នាក់។
ក្រោយកើតហេតុ កម្លាំងសមត្ថកិច្ចបានឃាត់ខ្លួនយកទៅប៉ុស្តិ៍នគរបាលរដ្ឋបាលស្រះចក ដើម្បីធ្វើការសួរនាំ និងកសាងសំណុំរឿងចាត់ការបន្តតាមផ្លូវច្បាប់៕
