ព្រះសីហនុ៖ កាលពីវេលាម៉ោងប្រមាណ ៣:៤៥នាទីរសៀល ថ្ងៃទី១២ ខែវិច្ឆិកា ឆ្នាំ២០២១នេះ មានហេតុការណ៍គ្រោះថ្នាក់ចរាចរណ៍មួយបានកើតឡើងក្រោយរថភ្លើងបានបុកជាមួយម៉ូតូមួយគ្រឿងបណ្តាលអោយម្ចាស់ម៉ូតូស្លាប់នៅនឹងកន្លែង។ ហេតុការណ៍នេះកើតឡើងនៅចំណុច ខ-៣ ភូមិអូរត្រជាក់ចិត្ត ឃុំសំរុង ស្រុកព្រៃនប់ ខេត្តព្រះសីហនុ។
បើតាមប្រភពពីសមត្ថកិច្ចបានអោយដឹងថា នៅម៉ោងកើតហេតុខាងលើមានរថភ្លើងមួយគ្រឿងបើកពីភ្នំពេញ ទៅក្រុងព្រះសីហនុ មកដល់ចំណុចខាងលើ ក៏មានម៉ូតូមួយគ្រឿងបើកឆ្លងផ្លូវ ហើយក៏បុក។ ក្រោយកើតហេតុរថភ្លើងបន្តដំណើរទៅមុខទៀត ខណៈម៉ូតូក៏ត្រូវបានសមត្ថកិច្ចយកទៅរក្សាទុក ហើយសពប្រគល់ជូនគ្រួសារយកទៅធ្វើបុណ្យ។ ម្ចាស់ម៉ូតូដែលស្លាប់មានឈ្មោះ លីវ ហុង ភេទប្រុស អាយុ៦៦ឆ្នាំ ទីលំនៅភូមិអូរត្រជាក់ចិត្ត ឃុំសំរុង ស្រុកព្រៃនប់ ខេត្តព្រះសីហនុ៕
