ព្រៃវែង៖ មានការភ្ញាក់ផ្អើលកាលពីល្ងាចថ្ងៃទី 7 ខែវិច្ឆិកា ឆ្នាំ 2021 វេលាម៉ោង 10:00 5:30នាទី ស្ថិតនៅភូមិទួលជៃ ឃុំព្រះស្ដេច ស្រុកព្រះស្ដេច ខេត្តព្រៃវែង ក្រោយរកឃើញក្មេងស្រីម្នាក់ដេកស្លាប់ក្នុងស្រែម្នាក់ឯង យ៉ាងអាណោចអាធ័ម ខណៈដែលសមត្ថកិច្ចដាក់ការសង្ស័យថា ជាករណី”រំលោភសម្លាប់”។
បើតាមប្រភពពីសមត្ថកិច្ចបានឲ្យដឹងថា ក្រោយទទួលពាក្យបណ្តឹងពីឈ្មោះ សួន ម៉ៃ ភេទស្រី អាយុ 36ឆ្នាំ រស់នៅភូមិឃុំកើតហេតុខាងលើ ហើយគាត់បានបញ្ជាក់ថាគាត់បានប្រទះឃើញសាកសពកូនស្រីរបស់គាត់ ឈ្មោះ ផល ផានិត ភេទស្រីអាយុ 12ឆ្នាំ នៅក្នុងទឹកជំរៅ 0,7ម៉ែត្រ ខាងកើតចំងាយ 300ម៉ែត្រ ពីប៉ុស្តិ៍កាដូង នៅភូមិទួលជៃ ឃុំព្រះស្ដេច ដែលជនរងគ្រោះបានបាត់ខ្លួនពីផ្ទះនៅវេលាម៉ោង22:30នាទីយប់ថ្ងៃទី6 ខែវិច្ឆិកា ឆ្នាំ 2021។
ក្រោយពីបានទទួលពាក្យបណ្តឹង សមត្ថកិច្ចនិងក្រុមគ្រូពេទ្យ បានចុះទៅដល់កន្លែងកើតហេតុពិនិត្យលើសាកសព អោយដឹងថាសាកសពមានបាក់ឆ្អឹងក ដាច់រលាត់ស្បែកកំភួនដៃស្តាំមួយកន្លែង ដាច់រលាត់ស្បែកលើក្បាលជង្គង់ឆ្វេងមួយកន្លែង និងមានស្នាមដាច់រយះប្រដាប់ភេទ។
យ៉ាងណាមិញ សមត្ថកិច្ចបានធ្វើការសន្និដ្ឋានថា ជនរងគ្រោះស្លាប់ដោយសារ រំលោភសម្លាប់។ បច្ចុប្បន្ន សាកសពបានប្រគល់ជូនក្រុមគ្រួសារធ្វើបុណ្យតាមប្រពៃណី និងកំពុងចុះស្រាវជ្រាវរកជនសង្ស័យ៕
