លោក Pep Guardiola បានអះអាងថា Cristiano Ronaldo បានឈឺចាប់ព្រោះតែក្រុម Manchester City ដោយសារតែគាត់មិនសូវបានប៉ះបាល់។ កីឡាករសញ្ជាតិព័រទុយហ្គាល់បានបង្ហាញខ្លួនក្នុងជម្រើស ១១នាក់ដំបូងសម្រាប់ Manchester United ក្នុងការប្រកួត Manchester Derby ជាលើកដំបូងរបស់គាត់នៅថ្ងៃសៅរ៍ ចាប់តាំងពីការវិលត្រឡប់ទៅកាន់ Old Trafford នៅរដូវក្តៅនេះ។ ក្រុមបិសាចក្រហមបានឆ្លងកាត់ពេលវេលាដ៏លំបាករួចទៅហើយក្នុងប៉ុន្មានសប្តាហ៍ថ្មីៗនេះ ប៉ុន្តែភាពវេទនារបស់ពួកគេ ត្រូវបានផ្សំឡើងដោយគូប្រជែងដែលមានកំរិតខ្ពស់។
ក្រុមម្ចាស់ជើងឯក Premier League បានធ្វើឱ្យ Manchester United ជួបការលំបាកខ្លាំង។ Cristiano Ronaldo ភាគច្រើនបានត្រឹមឈរមើល ហើយត្រូវបានគេបិទជាប់ ដោយមានឱកាសស៊ុតបានតែមួយជើងប៉ុណ្ណោះ។ លោក Guardiola បានបង្ហាញពីរបៀបដែលក្រុមរបស់គាត់លេង ដើម្បីបិទម្ចាស់ពានរង្វាន់ Ballon d’Or ប្រាំសម័យរូបនេះឲ្យជាប់។
ថ្លែងទៅកាន់សារព័ត៌មាន The Metro បន្ទាប់ពីការប្រកួត គ្រូបង្វឹកក្រុម Manchester City បាននិយាយថាបិសាចក្រហម ផ្តោតលើការវាយសម្រុករបស់ក្រុមភ្ញៀវ។ លោក Guardiola ក៏បានចង្អុលបង្ហាញថា Ronaldo មានការខកចិត្តដោយសារគាត់មិនសូវបានគ្រប់គ្រងបាល់។
Guardiola បាននិយាយថា៖ «យើងបានធ្វើការប្រកួតដ៏ល្អមួយ។ Rodri ល្អដូច Ilkay Gundogan និង Bernardo (Silva) ក្នុងការប្រជែងយកបាល់។ នោះជាមធ្យោបាយតែមួយគត់ ដើម្បីឈ្នះការប្រកួត។ ខ្ញុំដឹងថាកីឡាករដែលមានទេពកោសល្យដូចជា Cristiano គឺច្បាស់ជាឈឺចាប់នៅពេលដែលមិនសូវបានប៉ះបាល់។ នោះជាអ្វីដែលយើងចង់បាន»៕
សូមទស្សនាវីដេអូខាងក្រោម៖
