បាត់ដំបង ៖ នៅថ្ងៃទី១៥ ខែតុលា ឆ្នាំ២០២១ វេលាម៉ោង ១៣និង២០នាទី នៅឃុំអូរតាគី ស្រុកថ្មគោល ខេត្តបាត់ដំបង យុវជនម្នាក់ត្រូវបានឃាត់ខ្លួន អនុវត្តតាមផ្លូវច្បាប់ ។
តាមរបាយការណ៍នគរបាលស្រុកថ្មគោលបានឲ្យដឹងថា មានករណីរួមភេទជាមួយអនីតិជន អាយុក្រោម១៥ឆ្នាំ មួយកើតឡើង ដែលករណីនេះបង្កដោយជនសង្ស័យឈ្មោះ រី សុធី ហៅ ម៉េស ភេទប្រុស អាយុ១៨ឆ្នាំ រស់នៅក្នុងមូលដ្ឋានខាងលើ រីឯជនរងគ្រោះជាអនីតិជនឈ្មោះ រ-ឡ-ដ ភេទស្រី អាយុក្រោម១៥ឆ្នាំ រស់នៅក្នុងមូលដ្ឋានខាងលើជា មួយគ្នា។
សមត្ថកិច្ចនគរបាលស្រុកថ្មគោល បានសម្រេចធ្វើការឃាត់ខ្លួនជនសង្ស័យខាងលើ បន្ទាប់ពីទទួលបាននូវពាក្យបណ្តឹងរបស់អាណាព្យាបាលរបស់ជនរងគ្រោះ និងស្របតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង។ នៅពេលនេះ ជនសង្ស័យខាងលើ ត្រូវបានសមត្ថកិច្ចនគរបាលស្រុកធ្វើការសាកសួរ និងរៀបចំសំណុំរឿងបញ្ជូនទៅការិយាល័យជំនាញ តាមផ្លូវនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
