ភ្នំពេញ៖ ដូចយើងបានដឹងថាការចាក់វ៉ាក់កូវីដ១៩ ដោយសារមាន២ស្ថាប័នដែលទទួលបន្ទុកចាក់ រួមមានក្រសួងការពារជាតិ និងក្រសួងសុខាភិបាល។ ក្នុងនោះមានចម្ងល់ថា បើសិនជាលើកទី១ &ទី២ បានចាក់ជាមួយខាងក្រសួងសុខាភិបាល តើលើកទី៣ អាចចាក់ជាមួយខាងក្រសួងការពារជាតិបាន ឫទេ?
នៅក្នុងពេលដែរ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជានាយកប្រតិបត្តិចាក់វ៉ាក់សាំងក្រសួងការពារជាតិ នៅព្រឹកថ្ងៃទី១២ ខែតុលា ឆ្នាំ២០២១នេះ បានធ្វើដំណើរចុះពិនិត្យដំណើរការចាក់វ៉ាក់សាំងដូសជំរុញនៅទីតាំងមួយចំនួនក្នុងខណ្ឌទួលគោក និងខណ្ឌកំបូល។ នាយឧត្តមសេនីយ៍ ឥត សារ៉ាត់ បានបញ្ជាក់យ៉ាងដូច្នេះ “អ្វីដែលកងទ័ពចាក់ដូសទី១, ទី២ គឺកងទ័ពបន្តចាក់អ្នកនោះដដែល។ និយាយរួមអ្នកដែលមានបណ្ណចាក់វ៉ាក់សាំងរបស់កងយោធពលខេមរភូមិន្ទ ចេញឱ្យ ឬមួយអ្នកខ្លះមិនទាន់បានបណ្ណហ្នឹង មានលិខិតទម្រង់ចាក់ហ្នឹងយើងនឹងចាក់ជូនគាត់។ ដោយឡែកអ្នកចាក់នៅខាងសុខាភិបាល ហើយមានបណ្ណពណ៌ខៀវនោះ គឺយើងសូមឱ្យគាត់ទៅចាក់នៅកន្លែងណា ទៅចាក់នៅកន្លែងនោះវិញ”។
ក្នុងនាយឧត្តមសេនីយ៍ ឥត សារ៉ាត់ បានបន្ថែមថា ការដែលកងទ័ពមិនអាចចាក់ដូសជំរុញ សម្រាប់អ្នកចាក់ដូសទី១ និងដូសទី២ ដែលរៀបចំដោយក្រសួងសុខាភិបាលនេះ គឺដោយសារពាក់ព័ន្ធការងារបច្ចេកទេសមួយចំនួនលើការបញ្ចូលទិន្នន័យ។
