ភ្នំពេញ៖ នេះបើយោងតាមការបញ្ជាក់នៅលើផេកហ្វេសប៊ុកផ្លូវការណ៍របស់អ្នកឧកញ៉ា ឡេង ណាវ៉ាត្រា នៅព្រឹកថ្ងៃទី២១ ខែកញ្ញា ឆ្នាំ២០២១នេះ បានអោយដឹង អ្នកឧកញ៉ា នឹងបន្តការសិក្សាថ្នាក់បរិញ្ញាបត្ររបស់ខ្លួន ហើយជាពិសេសលោក ក៏បានផ្តល់នៅអាហាររូបករណ៍ ថ្នាក់បរិញ្ញាបត្រ ដល់ទៅ ១៥០កន្លែង សម្រាប់និស្សិតក្រីក្រផងដែរ។
ដោយក្នុងនោះលោកបានបញ្ជាក់ថា “ពេលនេះខ្ញុំមានឱកាសចូលរៀន បំពេញក្ដីស្រមៃរបស់ខ្ញុំហើយ!
ខ្ញុំបាទ សូមឧបត្ថម្ភអាហាររូបករណ៍លើការសិក្សាថ្នាក់បរិញ្ញាបត្រដល់និស្សិតក្រីក្រចំនួន ១៥០នាក់ ប្អូនៗមានសិទ្ធិដាក់ពាក្យទូទាំងប្រទេស (២៥ខេត្តក្រុង) ។
ក្នុងឱកាសដែលខ្ញុំបាទ បានបន្តការសិក្សាថ្នាក់បរិញ្ញាបត្រនេះ ខ្ញុំបាទសូមចែករំលែកការលំបាក ពីអតីតដែលមិនមានលទ្ធភាពសិក្សានៅមហាវិទ្យាល័យបានជួយទៅដល់ប្អូនៗនិស្សិតក្រីក្រក្នុងពេលនេះ អោយមានឱកាសរួមដំណើរជាមួយខ្ញុំ។ ពួកយើងនឹងរៀនជាមួយគ្នា ខ្ញុំបាទនឹងផ្ដល់អាទិភាពឱកាសការងារមុនគេ ចំពោះនិស្សិតក្រីក្រទាំងនោះ ក្នុងក្រុមហ៊ុនរបស់ខ្ញុំបាទ ដែលអាចទទួលប្រាក់ខែ ពី 300 ដុល្លារទៅ 4000 ដុល្លារទៅតាមការីកចម្រើន ចំណេះដឹងអត្តចរិតបុគ្គលិកលក្ខណៈ នៃលទ្ធភាពការងាររបស់និស្សិតនីមួយៗ។
ម្យ៉ាងទៀតខ្ញុំ នឹងចែករំលែកបទពិសោធន៍ ជាក់ស្ដែង ជូននិស្សិតក្រីក្រទាំងនោះ ដើម្បីឈានទៅរកគោលដៅអនាគតដ៏ល្អរុងរឿងរបស់ពួកគេ។
បញ្ជាក់៖ ខ្ញុំបាទនឹងចុះវាយតម្លៃផ្ទាល់ ចំពោះបងប្អូនដែលមានជីវភាពខ្វះខាតពិតប្រាកដ។
ជំនាញដែលត្រូវរៀនមានដូចជា៖ វិស្វករ សំណង់ អគ្គិសនី គណនេយ្យ ទីផ្សារ គ្រប់គ្រង ព័ត៌មានវិទ្យា”៕
