ភ្នំពេញ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយស សូមជម្រាបជូនសាធារណជន និង ម្ចាស់គណនីហ្វេសប៊ុក សុំមិនបញ្ចេញឈ្មោះ ដែលបាន Inbox និង Comment ក្នុងផេកហ្វេសបុកស្នងដ្ឋាននគរបាលខេត្តកណ្តាល មានខ្លឹមសារ៖ លោកស្នងការ ភោជនីយដ្ឋានឈ្មោះ ភ្នំយ៉ាត នៅថ្នល់ទទឹង លួចបើក និងជួបជុំផឹកស៊ីយ៉ាងសប្បាយ ដែលបានល្មើសបម្រាមវិធានការសុខាភិបាល ខ្ញុំជាប្រជាពលរដ្ឋរស់នៅស្រុកអង្គស្នួល សូមជួយចាត់វិធានការដើម្បីចូលរួម បង្ការជំងឺឆ្លងមេរោគកូវីដ-១៩ នៅកម្ពុជា។
ក្រោយពីទទួលបានព័ត៌មាននេះភ្លាម ដោយមានការចង្អុលបង្ហាញ ពីក្រុមការងារប្រតិកម្មរហ័ស នៃស្នងការដ្ឋាននគរបាលខេត្តកណ្តាល ដឹកនាំដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល។
ក្រុមការងារព័ត៌មាន និងប្រតិកម្មរហ័ស នៃអធិការដ្ឋាននគរបាលស្រុកអង្គស្នួល ដឹកនាំដោយលោកវរសេនីយ៍ឯក មាន សំណាង អធិការនគរបាលស្រុកអង្គស្នួល សូមធ្វើការបំភ្លឺដូចខាងក្រោម៖
នៅថ្ងៃទី០៦ ខែសីហា ឆ្នាំ២០២១ វេលាម៉ោង២១និង០០នាទី កម្លាំងអធិការដ្ឋាននគរបាលស្រុកអង្គស្នួល ដឹកនាំដោយលោកវរសេនីយ៍ទោ ផាច ផល្លា អធិការរង បានចុះទៅដល់ទីតាំងភោជនីយដ្ឋានភ្នំយ៉ាត មានទីតាំងស្ថិតនៅតាមបណ្តោយផ្លូវជាតិលេខ៤ ភូមិត្រពាំងរាំង ឃុំព្រៃពួច ស្រុកអង្គស្នួល ខេត្តកណ្តាល ពិនិត្យឃើញថាពុំមានការបើកលក់ដូរនោះទេ ហើយកម្លាំងសមត្ថកិច្ច បានធ្វើកិច្ចសន្យាបន្ថែមជាមួយម្ចាស់ហាង ហាមមិនឱ្យធ្វើការលក់ដូរជួបជុំផឹកស៊ីឡើយ ត្រូវគោរពតាមវិធានការរាជរដ្ឋាភិបាល និងស្តាប់តាមការណែនាំ របស់ក្រសួងសុខាភិបាល ដើម្បីចូលរួមទប់ស្កាត់ការ រីករាលដាលនៃជំងឺកូវីដ១៩ ៕
