នាយករដ្ឋមន្រ្តីកម្ពុជា! ប្រទេសដែលអួតថា វ៉ាក់សាំងខ្លាំង ក៏មានករណីឆ្លងនិងស្លាប់ ទោះបីចាក់វ៉ាក់សាំង ២ដូសក៏ដោយ

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងថា ករណីចាក់វ៉ាក់សាំង ២ដូសហើយ នៅតែឆ្លង និងស្លាប់ដោយសារជំងឺកូវីដ-១៩ មិនមែនមានតែកម្ពុជាទេ សូម្បីអាមេរិក អង់គ្លេស និងប្រទេសអឺរ៉ុប ក៏មានករណីដូចគ្នា ហើយសុទ្ធតែអួតថា វ៉ាក់សាំងរបស់ខ្លួនខ្លាំងៗទៀត។

ថ្លែងក្នុងឱកាសអញ្ជើញទទួលដោយផ្ទាល់នូវការមកដល់នៃ វ៉ាក់សាំងជំងឺកូវីដ១៩ ប្រភេទ AstraZeneca ដែលជាជំនួយរបស់រដ្ឋាភិបាល និងប្រជាជនជប៉ុន នៅថ្ងៃទី២៣ ខែកក្កដា ឆ្នាំ២០២១ សម្ដេច តេជោ ហ៊ុន សែន បានថ្លែងថា «ករណីចាក់វ៉ាក់សាំង២ដូសហើយនៅ តែឆ្លង (ឆ្លងជំងឺកូវីដ) ហើយនៅតែស្លាប់ មិនមែនមានតែករណីនៅកម្ពុជាទេ សូម្បីតែនៅសហរដ្ឋអាមេរិក នៅអង់គ្លេស និងនៅប្រទេសក្នុងអឺរ៉ុប គឺមានករណីដូចគ្នា សុទ្ធតែវ៉ាក់សាំងអួតថា ខ្លាំងៗ»។

សម្ដេចតេជោ បន្ដថា ទោះបី ប្រជាពលរដ្ឋទទួលវ៉ាក់សាំង ឬមិនទាន់ទទួលវ៉ាក់សាំង ការការពារតាមវិធានការសុខាភិបាល ៣កុំ និង៣ការពារ គឺនៅតែបន្ដអនុវត្តជានិច្ច ដែលជាវិធានការល្អបំផុតសម្រាប់ប្រជាពលរដ្ឋគ្រប់រូប។
សម្ដេច សង្ឃឹមថា ឪពុក-ម្ដាយ ចាក់វ៉ាក់សាំងរួចហើយគ្មានបញ្ហា នឹងនាំកូនមានអាយុ១២ឆ្នាំ ដល់១៧ ឆ្នាំ ទៅចាក់វ៉ាក់សាំង ឲ្យបានគ្រប់ៗគ្នា ដើម្បីបង្កើនភាពស៊ាំនៅក្នុងផ្ទះ។

សូមរំលឹកថា គិតត្រឹមថ្ងៃទី២៣ ខែកក្កដា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ ចំនួន៧១,២៤៤នាក់ ក្នុងនោះ អ្នកជាសះស្បើយ ចំនួន ៦៣,៤៧៤នាក់ និងអ្នកស្លាប់ ចំនួន ១២២២នាក់៕