ភ្នំពេញ៖ ក្រោយក្ដោបក្ដាប់បានជុំវិញរឿងសត្វតោ ពេលនេះសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចអនុញ្ញាតឲ្យម្ចាស់ដែលជនជាតិ ទទួលយកទៅចិញ្ចឹមវិញ ប៉ុន្តែតែធ្វើទ្រុងដាក់ឲ្យបានត្រឹមត្រូវ ដើម្បីធានាសុវត្ថិភាពទាំងមនុស្សក្នុងផ្ទះ និងអ្នករស់នៅជិតខាង ។
តាមរយៈបណ្ដាញសង្គមហ្វេសប៊ុក កាលពី៩ម៉ោងមុន សម្ដេចតេជោ ហ៊ុន សែន បានបញ្ជាក់ថា «ក្រោយក្តាប់បានរឿងសត្វតោ ។ ល្ងាចនេះខ្ញុំបានពិភាក្សា ជាមួយរដ្ឋមន្ត្រីក្រសួងកសិកម្ម និងបានឯកភាពគ្នាថា អនុញ្ញាតឱ្យម្ចាស់យកទៅចិញ្ចឹមវិញ ក្នុងលក្ខណ្ឌម្ចាស់ត្រូវធ្វើ ទ្រុងឱ្យបានត្រឹមត្រូវ ដើម្បីធានាសុវត្ថិភាពទាំងមនុស្សក្នុងផ្ទះ និងអ្នករស់នៅជិតខាង។ អរគុណបងប្អូនជនរួមជាតិទាំងក្នុង និងក្រៅប្រទេសដែលបានផ្តល់យោបល់ និងអាណិតដល់សត្វតោ» ។
សូមរំលឹកថា កាលពីព្រឹកថ្ងៃទី២៧ មិថុនា អាជ្ញាធរចម្រុះ បានចុះដកហូត យកសត្វតោឈ្មោល រស់មួយក្បាល ទម្ងន់ជាង ៧០គីឡូក្រាម ពីជនជាតិចិន ដែលបានចិញ្ចឹមដោយខុសច្បាប់ នៅក្នុងលំនៅដ្ឋានរបស់ខ្លួន ស្ថិតនៅផ្ទះលេខ២២ ផ្លូវ៣០៦ ភូមិ៧ សង្កាត់បឹងកេងកង១ ខណ្ឌបឹងកេងកង ក្រោយពីមានការរាយការណ៍ ពីប្រជាពលរដ្ឋជិតខាង។ ចំពោះសត្វតោឈ្មោល មួយក្បាលនោះត្រូវបានប្រគល់ជូន ទៅកាន់មជ្ឈមណ្ឌលថែទាំ និងសង្គ្រោះសត្វព្រៃភ្នំតាម៉ៅ ដើម្បីចិញ្ចឹមបីបាច់បន្ត ៕
