ភ្នំពេញ៖ រថយន្តសេរីទំនើបម៉ាក Rolls Royce មួយគ្រឿង បើកល្បឿនដូវហោះ ជ្រុលបុកបុរស-នារីចំនួន ៤នាក់ កំពុងជិះម៉ូតូ ចំពាក់កណ្តាលពេញទំហឹង បណ្តាលឲ្យរងរបួសធ្ងន់ ហើយរថយន្តបន្តបន្ថែមល្បឿន បើករត់គេចចូលភូមិគ្រឹះបាត់ ។
ហេតុការណ៍នេះបានបង្កការភ្ញាក់ផ្អើល កាលពីម៉ោង ១២៖១៥នាទីយប់ ឈានចូលថ្ងៃទី២៣ ខែខែមិថុនា ឆ្នា២០២១ ស្ថិតត្រង់ចំណុចស្តុបប៉េកាសេ តាមបណ្ដោយមហាវិថីព្រះមុនីវង្ស កែងផ្លូវព្រះអង្គឌួង សង្កាត់ស្រះចក ខណ្ឌដូនពេញ រាជធានីភ្នំពេញ។
ក្រោយពេលកើតហេតុ កម្លាំងនគរបាលខណ្ឌដូនពេញ សហការជាមួយកម្លាំង នគរបាលខណ្ឌជ្រោយចង្វារ តាមរកឃើញរថយន្ត នៅក្នុងភូមិគ្រឹះមួយកន្លែងផ្ទះលេខ២៨២ ផ្លូវកែវចិន្តា ក្នុងសង្កាត់ជ្រោយចង្វារ តែសមត្ថកិច្ចកំពុងរងចាំគោលការណ៍ពីថ្នាក់លើ ដើម្បីយកអ្នកបើកបរ និងរថយន្តមកដោះស្រាយតាមនីតិវិធីច្បាប់ ៕
