ភ្នំពេញ៖ ក្រោយផ្ទុះកក្រើកបណ្ដាញសង្គម រឿងកញ្ញា ដេនីខ្វាន់ ជាមួយម្ចាស់សណ្ឋាគារសមុទ្យមាស នៅក្រុងព្រះសីហនុ រឿងលួចបង្កប់កាំមេរ៉ា ក្នុងបន្ទប់គេងរបស់ភ្ញៀវ លោកឧត្ដមសេនីយ៍ ទី ចំរើន កុសល បានលើកឡើងថា មិនសំខាន់ប្រុសឬស្រី ស្នាក់នៅគ្នាប៉ុន្មានអ្នកទេ សំខាន់សណ្ឋាគារនេះ បានបំពានច្បាប់ ។
តាមរយៈបណ្ដាញសង្គមហ្វេសប៊ុក នៅថ្ងៃទី២៥ ឧសភានេះ ឧត្ដមសេនីយ៍ ទី ចំរើន កុសល បានបញ្ជាក់យ៉ាងដូច្នេះថា «សណ្ឋាគារ សមុទ្រមាស ( Gold Sea Hotel) នៅក្រុងព្រះសីហនុ លួចបង្កប់កាម៉េរា នៅក្នុងបន្ទប់គេងរបស់ភ្ញៀវ។ អ្នកស្នាក់នៅចាប់បាន បុរសម្នាក់ទំនងជាអ្នកគ្រប់គ្រង សណ្ឋាគារខាងលើខំប្រឹងលាងខ្លួន ដោយចោទជាសំណួរទៅភ្ញៀវថា បន្ទប់ហ្នឹងស្នាក់នៅគ្នាប៉ុន្មាននាក់? ប្រុសឬស្រី? មិនសំខាន់ប្រុសឬស្រី ស្នាក់នៅគ្នាប៉ុន្មានអ្នកទេ សំខាន់សណ្ឋាគារនេះបានបំពានច្បាប់។ ធ្វើបែបនេះតើអ្នកណាហ៊ានទៅស្នាក់នៅ? រឿងក្តីនេះកើតឡើងតាំងពីខែ១០ ឆ្នាំ២០២០។ ម្ចាស់Hotel បានសងសំណងជាប្រាក់ ១ម៉ឺនដុល្លារ ដល់ប្អូនស្រីដូចមានរូប នៅក្នុងវីដេអូខាងក្រោម» ។
សូមរំលឹកថា កញ្ញា ដេនី ខ្វាន់ បានបង្ហាញការឈឺចាប់យ៉ាងខ្លាំ និងស្រែកទាមទារយុត្តិធម៌ ក្រោយពីម្ចាស់សណ្ឋាគារ សមុទ្រមាស នៅក្រុងព្រះសីហនុ លួចបង្កប់កាំមេរ៉ាក្នុងបន្ទប់ដែលនាងគេង ។
តាមរយៈបណ្ដាញសង្គមហ្វេសប៊ុក នៅព្រឹកថ្ងៃទី២៥ ឧសភានេះ កញ្ញា ដេនីខ្វាន់ បញ្ជាក់ថា «ខ្ញុំគេងសណ្ឋាគារ សមុទ្រមាស ( Gold Sea Hotel) នៅក្រុងកំពង់សោម ម្ចាស់ Hotel លួចបង្កប់ Camera ក្នុងបន្ទប់ខ្ញុំគេង បញ្ជាក់មិនមែនតែបន្ទប់ខ្ញុំទេ គឺគ្រប់បន្ទប់ទាំងអស់ក្នុង Hotel នោះ រឿងក្តីខ្ញុំកើតឡើងតាំងពីខែ១០ ឆ្នាំ២០២០ ខ្ញុំមិនឡាយព្រោះរង់ចាំ ដំណោះស្រាយល្អជាមួយម្ចាស់ Hotel តែលទ្ធផលចេញមកវាអយុត្តិធម៌ សំរាប់រូបនាងខ្ញុំណាស់ សំណងលុយ ១ម៉ឺនដុល្លារនេះដូចជាមើលងាយ កិត្តិយសខ្ញុំជាស្រី្តខ្មែរពេកហើយ ខ្ញុំឈឺចាប់ខ្លាំងណាស់ ខ្ញុំទទួលយកមិនបានទេ អយុត្តិធម៌ណាស់» ។
ដេនី ខ្វាន់ បន្តថា «ឈឺចាប់បំផុតជាមួយរឿងក្តីរបស់ខ្ញុំ នៅខេត្តព្រះសីហនុ ខ្ញុំគេងHotel ម្ចាស់Hotel លួចបង្កប់Camera ក្នុងបន្ទប់ខ្ញុំគេង ខ្ញុំមិនឡាយFbគឺរង់ចាំដំណោះស្រាយល្អជាមួយម្ចាស់Hotel តែលទ្ធផលចេញមកអយុត្តិធម៌សំរាប់ខ្ញុំណាស់ ដាច់ខែនេះខ្ញុំសុំធ្វើសន្និសិតកាសែតដើម្បីអោយដឹងសខ្មៅ រកយុត្តិធម៌សំរាប់ខ្លួនខ្ញុំ» ៕
