ភ្នំពេញ៖ ស្រ្តីមានវ័យ៤២ឆ្នាំម្នាក់ បានអះអាងថា ខ្លួនគាត់ជាប្រពន្ធដើម បានតាមទាន់ប្ដីកំហូច របស់ខ្លួន ដែលចុះចោលប្រពន្ធកូន មកបង្កាត់ភ្លើងស្នេហ៍ ជាមួយស្រីថ្មី ហើយជួលបន្ទប់លាក់ខ្លួន ពួនអាត្មា សាងស្នេហ៍ផ្អែមល្ហែម ជាមួយគ្នាអស់រយៈពេលជាច្រើនខែមកហើយ។ ករណីប្រពន្ធដើមតាមទាន់ជាន់កែងប្តីជើងល្អ កំពុងនៅជាមួយស្រីស្នេហ៍នេះ បានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង០៩និង៣០នាទីយប់ ថ្ងៃទី២៤ ខែឧសភា ឆ្នាំ២០២១ ក្នុងសង្កាត់អូបែកក្អម ខណ្ឌសែនសុខ រាជធានីភ្នំពេញ ។
ស្រ្តីជាប្រពន្ធដើម បានឲ្យថា ប្ដីប្រពន្ធរបស់គាត់មួយគូនេះ មិនបានរៀបការនោះទេ គឺស្រឡាញ់គ្នាតែចិត្ត ហើយនិងចិត្តតែប៉ុណ្ណោះ។ កាលពីរូបគាត់ បានស្រលាញ់គ្នា ពេលដែលទៅរកស៊ី នៅឯប្រទេសថៃ រហូតមកដល់ពេលនេះ គឺជាង១០ឆ្នាំហើយ ដោយបង្កើតកូន បានមួយ ទុកជាចំណងដៃ និស្ស័យស្នេហ៍ឆ្លងដែន។ ក្រោយមកចេះតែមាន ការរកាំរកូស រស់នៅមិនចុះសម្រុងនឹងគ្នា រហូតប្តីជើងល្អនេះ បានចុះចោលប្រពន្ធកូន មកលួចបង្កាត់ភ្លើងស្នេហ៍ ជាមួយស្រីថ្មី។
ដោយឡែក បុរសជាប្ដីបានរៀបរាប់ឲ្យដឹងថា មុនពេលដែលរូបគាត់ បានចុះចេញពីផ្ទះ មករួមរស់ប្រពន្ធថ្មីនេះ ក៏ដោយសារតែប្រពន្ធដើម ពូកែជេរដៀលត្មះ ថារូបគាត់ជាប្តី ជាមនុស្សគ្មានកំណើត ទើបរូបគាត់ទ្រាំរស់នៅលែងបាន ក៏សម្រេចចិត្តមករស់នៅជាមួយនឹងប្រពន្ធក្រោយដើម្បីសាងជីវិតជាថ្មី រកសេចក្តីសុខប្រចាំជីវិត។ បន្ទាប់មក មានកម្លាំងសមត្ថកិច្ចមូលដ្ឋាន ក៏បានហៅអ្នកទាំងបី មកកាន់ប៉ុស្តិ៍នគរបាល អូរបែកក្អម ដើម្បីធ្វើការសាកសួរ និងដោះស្រាយគ្នាតាមផ្លូវច្បាប់ ៕
