ភ្នំពេញ៖ តូចចិត្តនឹងប្ដីតែងតែប្រចណ្ឌ ធ្វើបាបផ្លូវចិត្តស្ទើររៀងរាល់ថ្ងៃ ស្រីស្អាតរូបស្រស់ម្នាក់ ដើរយំសំដៅមកលោតទឹកសម្លាប់ខ្លួន ពីលើស្ពានជ្រោយចង្វារ តែមិនបានសម្រេច ត្រូវបានកម្លាំងសមត្ថកិច្ចប្រចាំការណ៍គោលដៅជួយឃាត់ទាន់ ។ ហេតុការណ៍នេះ បានកើតឡើងកាលពីម៉ោង១០៖២០នាទីយប់ថ្ងៃទី១៨ ខែមេសា ឆ្នាំ២០២១ ស្ថិតនៅចំណុចគល់ស្ពានជ្រោយចង្វារ ត្រើយខាងកើតក្នុងសង្កាត់ស្រះចក ខណ្ឌដូនពេញ ។
ស្ត្រីរងគ្រោះមានឈ្មោះ សុខ ខេង ភេទស្រី អាយុ២៥ឆ្នាំ ជនជាតិខ្មែរ មុខរបរសំអាងការស្នាក់នៅផ្សារសាមហាន់ សង្កាត់ទួលសង្កែទី១ខណ្ឌឬស្សីកែវរាជធានីភ្នំពេញ។
បើតាមប្រភពព័ត៌មានបានឲ្យដឹងថាមុនពេលកើតហេតុ មានស្ត្រីរងគ្រោះខាងលើ ដើរបណ្តើរយំបណ្តើរពីលិចទៅកើត សំដៅឡើងស្ពានជ្រោយចង្វារ ខណៈមកដល់ចំណុចកើតហេតុខាងលើត្រូវបានសមត្ថកិច្ចឃាត់សួរនាំ ទើបដឹងថាស្ត្រីរូបនោះមានវិបត្តិក្នុងគ្រួសារហើយប៉ុនប៉ងលោតទឹកសម្លាប់ខ្លួន។
បើតាមស្ត្រីរងគ្រោះបានរៀបរាប់ ទាំងទឹកភ្លែកថា ប្ដីរបស់គាត់តែងតែធ្វើបាបផ្លូវចិត្តយ៉ាងធ្ងន់ធ្ងូរ តែងតែប្រចណ្ឌគាត់មិនមានហេតុផល រករឿងគាត់ស្ទើររាល់ថ្ងៃ ទើបគាត់សម្រេចចិត្តមកបញ្ចប់ជីវិតលោតទឹកសម្លាប់ខ្លួន តែមិនទាន់បានលោតផងត្រូវសមត្ថកិច្ចឃាត់តែម្ដង។
ក្រោយមកសមត្ថកិច្ច បានទាក់ទងទៅប្ដីរបស់នាង ឲ្យមកយកត្រលប់ទៅផ្ទះវិញបាត់ទៅ៕
