ភ្នំពេញ ៖ យោងតាមប្រសាសន៍ណែនាំដ៏ខ្ពង់ខ្ពស់ របស់ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានដាក់បទបញ្ជា ដល់កងកម្លាំងកិច្ចការ ពិសេស SDU នៃស្នងការដ្ឋាន នគរបាលរាជធានីភ្នំពេញ ដឹកនាំដោយលោកវរសេនីយ៍ទោ អ៊ុន ប៊ុនធីម នាយរងការិយាល័យអន្តរាគមន៍ និងតម្រួតបទបញ្ជា នៃស្នងការដ្ឋាន នគរបាលរាជធានីភ្នំពេញ ដើម្បីចុះល្បាតការពារសន្តិសុខ សណ្តាប់ធ្នាប់ ក្នុងភូមិសាស្ត្រ ខណ្ឌចំនួន៥ គឺខណ្ឌដូនពេញ ខណ្ឌចំការមន ខណ្ឌបឹងកេងកង ខណ្ឌមានជ័យ និងខណ្ឌពោធិ៍សែនជ័យ ។
យោងតាមអគ្គស្នងការនគរបាលជាតិបានឲ្យដឹងថាជាក់ស្តែង កម្លាំងកិច្ចការពិសេស SDU បានសហការជាមួយកម្លាំងនគរបាលខណ្ឌចំការមន និងសន្តិសុខយាម នៅកោះពេជ្រ បានធ្វើការចុះល្បាត ប្រទះឃើញ ក្មេងទំនើងមួយក្រុមធំ ប្រមូលផ្តុំគ្នាជាបក្ខពួកវាយតប់គ្នា បង្កភាពអនាធិបតេយ្យ នៅខាងក្រោយ សាលាក្រុង សួនកោះពេជ្រ ។
ភ្លាមៗនោះដែរ កម្លាំងបានចុះធ្វើការពួនស្ទាក់ ឃាត់ខ្លួន ក្រុមក្មេងទំនើងទាំងនោះ បានចំនួន៤៨នាក់ ដោយសហការជាមួយ អធិការនគរបាលខណ្ឌ ដើម្បីឆែកឆេរលើខ្លួនពួកគេ និងធ្វើការអប់រំណែនាំរួច អនុញ្ញាតឲ្យពួកគេត្រឡប់ទៅលំនៅដ្ឋានវិញ ៕
