ភ្នំពេញ ៖ កុមារអាយុជាង១ឆ្នាំម្នាក់បានបាត់បង់ជីវិត និងកុមារតូចៗ៥នាក់ទៀត បានកំពុងសម្រាកព្យាបាលនៅមន្ទីរពេទ្យ ដោយសារតែពុលសត្វគីង្គក់ ក្រោយពីពួកគេបានចាប់រួចក៏នាំគ្នាដុតហូបពេលដែលឪពុកម្ដាយមិននៅផ្ទះ។ ហេតុការណ៍នេះបានកើតឡើងនៅវេលាម៉ោង៤និង៣០នាទីសៀលថ្ងៃទី៣ ខែមីនា ឆ្នាំ២០២១ ស្ថិតនៅភូមិត្រពាំងព្នៅ ឃុំច្រេស ស្រុកកំពង់ត្រឡាច ។
យោងតាមប្រភពព័ត៌មានបានដឹងថាកុមារារងគ្រោះដែលបាត់បង់ជីវិតមានឈ្មោះ ឃិត បូរ៉ា អាយុ១ឆ្នាំ៨ខែ មានឪពុកឈ្មោះ សុខ ឃូឡា និងម្ដាយឈ្មោះ អាន សារិន ។
ចំណែកក្មេងរងគ្រោះ៥នាក់ទៀតមាន ៖
១-កុមារា ត្រុង វាសនា អាយុ៥ឆ្នាំ
២-កុមារា ឃតត ពិសិដ្ឋ អាយុ៧ឆ្នាំ
៣-កុមរា វីសុផារិទ្ធ អាយុ៧ឆ្នាំ
៤-កុមារី សល់ មីនា អាយុ៨ឆ្នាំ
៥-កុមារា ឃិត ពៅ អាយុ៤ឆ្នាំ។កុមារតូចៗទាំងអស់រស់នៅភូមិ-ឃុំកើតហេតុខាងលើ ។
ប្រភពដដែលបន្តថា មុនពេលកើតហេតុ ម៉ោងប្រមាណជាង១០ព្រឹក ខណៈពេលដែលឪពុកម្ដាយរបស់ពួកគេបានធ្វើការនៅរោងចក្រអស់ ចំណែកជីដូនជីតា ក៏នាំគ្នាទៅវត្ត ហើយពួកគេក្មេងៗក៏បាននាំគ្នាដើរទៅវាលស្រែ ចាប់បានសត្វគីង្គក់ រួចយកមកអាំងហូបតែម្តង៕
