ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានប្រកាសតាមបណ្ដាញសង្គមហ្វេសប៊ុក នៅព្រឹកថ្ងៃទី២០ កុម្ភៈនេះថា នៅថ្ងៃនេះអាចមានរឿងកូវីដ១៩ ធ្ងន់នៅកម្ពុជាហើយ ។ ប៉ុន្តែលោកមិនបានបញ្ជាក់ថា ជាបញ្ហាអ្វីឲ្យប្រាកដនោះគ្រាន់តែ បង្ហើបឲ្យដឹងថា ជាបញ្ហាពាក់ព័ន្ធនឹងជំងឺកូវីដ១៩ ។
លោករដ្ឋមន្ត្រីព័ត៌មាន បានបញ្ជាក់យ៉ាងដូច្នេះថា «ថ្ងៃនេះ មានរឿងកូវីដ១៩ ធ្ងន់នៅកម្ពុជាហើយ ។ សូមរង់ចាំ ដំណឹងពីសុខាភិបាល» ។
ជាមួយគ្នានោះ នៅម៉ោង ៩.០០នាទីព្រឹកនេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញថ្លែងសារពិសេសទៅកាន់ បងប្អូនប្រជាពលរដ្ឋទូទាំងប្រទេស តាមរយៈការផ្សាយផ្ទាល់របស់ ទូរទស្សន៍ជាតិកម្ពុជា គេហទំព័រហ្វេសប៊ុកផ្លូវការរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ទូរទស្សន៍បាយ័ន និងប្រព័ន្ធផ្សព្វផ្សាយជាច្រើនផ្សេងទៀត៕
