ភ្នំពេញ៖ ឃាត់ខ្លួនបុរសជនជាតិយូហ្គាន់ដាម្នាក់ ក្រោយបម្រុងលួចនាំគ្រឿងញៀនជិត ២គីឡូក្រាម ឡើងយន្តហោះ ទៅកាន់ប្រទេសកូរ៉េខាងត្បូង ។
ប្រតិបត្តិការនេះធ្វើឡើងដោយកម្លាំងជំនាញ (ក១០) នៃមន្ទីរប្រឆាំងបទល្មើសគ្រឿងញៀន ដឹកនាំដោយលោក សារី បុត្រសត្យា ចូលរួមសហការជាមួយគយអាកាសយានដ្ឋានអន្តរជាតិភ្នំពេញ ព្រមទាំងមានការសម្របសម្រួលពីលោក ប្លង់ សុផល ព្រះរាជអាជ្ញារងរាជធានីភ្នំពេញ បានដំណើរការត្រួតពិនិត្យកាបូបស្ពាយ មិនប្រក្រតីសង្ស័យលាក់បង្កប់ សារធាតុញៀន ឃាត់ជនសង្ស័យ ម្នាក់ ជាជនជាតិ យូហ្គាន់ដា កាលពីថ្ងៃទី១០ ខែកុម្ភៈ ឆ្នាំ២០២១ នៅវេលាម៉ោង២០ និង៣០នាទី នៅចំណុច អាកាសយានដ្ឋានអន្តរជាតិភ្នំពេញ ស្ថិតក្នុងសង្កាត់ចោមចៅ១ ខណ្ឌពោធិ៍សែន រាជធានីភ្នំពេញ។
ជនសង្ស័យឈ្មោះ MUGERWA JOEL ភេទប្រុស អាយុ ៤៣ឆ្នាំ ជនជាតិ យូហ្គាន់ដា កាន់លិខិតឆ្លងដែនលេខB១៣២២៩៧ ចាប់យកវត្ថុតាង ថ្នាំញៀន ប្រភេទមេតំហ្វេតាមីន (ICE) ទម្ងន់សុទ្ធ ១៩២២.៩០ក្រាម។ ថ្នាំញៀននេះ ជនសង្ស័យនាំចេញពីកម្ពុជា ទៅកាន់ប្រទេសសាធារណរដ្ឋកូរ៉េ ចេញពីកូរ៉េ ទៅកាន់ ឌូបៃ ប្រទេស អារ៉ាប់រួម ចេញពីឌូបៃ ទៅកាន់ប្រទេស យូហ្គាន់ដា ៕
