ភ្នំពេញ៖ ព្រះសង្ឃតូចមួយអង្គ និមន្តទៅស្រង់ទឹក នៅកន្លែងទឹកធ្លាក់ជាន់ទី៣ នៃភ្នំគូលែង ស្រាប់តែលង់ទឹកសុគតតែម្ដង ។ ហេតុការណ៍ បានកើតឡើង កាលពីថ្ងៃត្រង់ ថ្ងៃទី៧ ខែកុម្ភ: ឆ្នាំ២០២១ ស្ថិតនៅឃុំខ្នងភ្នំ ស្រុកស្វាយលើ ខេត្តសៀមរាប។
បើតាមប្រភពព័ត៌មាន បានឲ្យដឹងថា មានព្រះសង្ឃ និងពុទ្ធបរិសទ័មួយក្រុម និមន្តនិងអញ្ជើញមកពីវត្តអណ្តើក ខេត្តបាត់ដំបង បានមកគោរពបូជា និងទស្សនាកម្សាន្ត នៅរមណីដ្ឋានភ្នំគូលែន។ ហើយព្រះសង្ឃទាំងអស់ មានចំនួន៥០អង្គ បាននិមន្តទៅស្រង់ ទឹក ធ្លាក់ជាន់ទី៣ ក្រោយស្រង់រួចក៏បានឡើងមកជាន់ទី២វិញ ស្រាប់តែបាត់ព្រះសង្ឃតូចមួយអង្គនាម យឿន សុផុន ក៏ផ្អើលឈូឆរ នាំគ្នាចុះទៅរក ក្នុងទឹកវិញស្រាប់តែឃើញព្រះសង្ឃអង្គនោះ បានលង់ទឹកសុគតបាត់ទៅហើយ។ ក៏បានស្រង់យកមកលើគោក និងបានរាយការណ៍ជូនសមត្ថកិច្ច។
ព្រះសង្ឃ ដែលលង់ទឹក ព្រះនាម យឿន សុផុន មានព្រះជន្ម ១៤ព្រះវស្សា មានទីលំនៅភូមិ អូរប្រាំទី២ ឃុំ មាឃ ស្រុក ស្ទឹងត្រង់ ខេត្តកំពង់ចាម បានគង់នៅវត្តអណ្តើក ខេត្តបាត់ដំបង ហើយក៏ត្រូវបានកម្លាំងសមត្ថកិច្ច បានធ្វើសុកោវិច្ច័យរួចបានប្រគល់សព ជូនអាណាព្យាបាល ជាគ្រូចៅអធិការវត្ត យកទៅកាន់ទីវត្ត ដើមី្បធ្វើបុណ្យទៅតាមប្រពៃណីសាសនា ៕
