ភ្នំពេញ៖ មានហេតុការណ៍ដ៏គួរឲ្យ សង្វេគមួយបានកើតឡើង នៅក្នុងពិធីមង្គការមួយ គឺកូនកម្លោះបានខ្យល់គហើយត្រូវគ្រួសារ ដឹកទៅសង្គ្រោះនៅមន្ទីរពេទ្យ តែក្រោយមកបានស្លាប់ ប៉ុន្តែអ្វីគួរចាប់អារម្មណ៍នោះ គឺម្ដាយខាងកូនកម្លោះ មិនប្រាប់ដំណឹងនេះឲ្យកូនក្រមុំបានដឹងនោះទេ ដោយឲ្យនៅទទួលភ្ញៀវដូចធម្មតា ។ ហេតុការណ៍នេះ បានកើតឡើងកាលពីម៉ោងជាង ៣រសៀល ថ្ងៃទី៤ ខែកុម្ភៈ ឆ្នាំ២០២១ ស្ថិតនៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ។
ជនរងគ្រោះជាកូនកម្លោះមានឈ្មោះ ក្រុង ពុធ ។ ក្រោយពីកូនកម្លោះបានស្លាប់ ក្រុមគ្រួសារខាងប្រុសបានដឹកសព យកទៅតម្កល់ធ្វើបុណ្យនៅវត្តសំរោង ក្នុងភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង ។
បើតាមប្រភពព័ត៌មាន ពីក្រុមគ្រួសារសពកូនកម្លោះ បានឲ្យដឹងថា ក្រោយកើតហេតុកូនកម្លោះបានស្លាប់ ក្នុងពេលហៀបនឹងទទួលភ្ញៀវបៀបនេះ ក្រុមគ្រួសារបានប្រាប់ទៅកូនក្រមុំថា កូនកម្លោះ នៅមិនទាន់ជាទេ កំពុងនៅពេទ្យ នៅឡើយហើយឱ្យកូនក្រមុំ ទទួលភ្ញៀវតែម្នាក់ឯងសិនចុះ ។
ប្រភពដដែលបានបន្តថា ការនិយាយបែបនេះ គឺក្នុងគោលបំណងឱ្យពិធីមង្គលការ បានប្រព្រឹត្តទៅជាធម្មតា ព្រោះដល់ពេលទទួលភ្ញៀវទៅហើយ ណាមួយដើម្បីបានចំណងដៃ សម្រាប់ទូរទាត់លើថ្លៃចំណាយផ្សេងៗដូចជា ថ្លៃភេ្លងខ្មែរ តន្ត្រីសម័យ សំអាង និងម្ហូបជាដើម ។ លុះពេលពិធីទទួលភ្ញៀវចាប់ផ្តើម ក៏មានភ្ញៀវបានមកចូលររួមពិសាអាហារ ក្នុងមង្គលការជាបន្តបន្ទាប់រហូតដល់ពេញ៥២តុ ក្នុងចំនួន៦៥តុ ដែលម្ចាស់ដើមការបានកុម្មង់ ៕
