ភ្នំពេញ៖ ពិតសាហាវព្រៃផ្សៃ រកលេខដាក់គ្មានមែន! គ្រាន់តែកូនស្រីចុង យកសៀវភៅមកឲ្យយឺតយ៉ាវ ម្ដាយចុងចិត្តខ្មៅ ទាញកាំបិតប៉័ងតោកាប់ រងរបួសធ្ងន់ ។ ហេតុការណ៍នេះ បានបង្កឱ្យមានកាភ្ញាក់ផ្អើល កាលពីម៉ោង ៧យប់ថ្ងៃទី២៥ ខែមករា ឆ្នាំ២០២១ ស្ថិតនៅភូមិប្រប្រកខាងជើង សង្កាត់កាកាបទី១ ខណ្ឌពោធិ៍សែនជ័យ ។
ក្មេងស្រីជនរងគ្រោះខាងលើមានឈ្មោះ ស្រីពេជ្រ អាយុ១៧ទៅ១៨ឆ្នាំ មុខរបរនៅផ្ទះ ចំណែកស្ត្រីជាម្តាយចុង និងឪពុកចុងមិនទាន់ បានស្គាល់ឈ្មោះនៅឡើយ គ្រាន់តែដឹងថា ស្ត្រីជាម្តាយចុងមានប្តី ៣នាក់ទៅហើយ ហើយកូនស្រីរងគ្រោះជាកូនរបស់ប្តីទី១ បច្ចុប្បន្នម្តាយចុងរូបនេះ មានកូនចំនួន៣នាក់ ក្នុងនោះកូនបង្កើតស្រីម្នាក់ និងប្រុសម្នាក់។
បើតាមប្រជាពលរដ្ឋនៅកន្លែងកើតហេតុ បានរៀបរាប់ថា ជនរងគ្រោះ គឺជាក្មេងកំព្រា ម្តាយទទួលមរណភាពចោល បន្ទាប់មកឪពុកក៏យកប្រពន្ធមួយទៀត លុះពេលឪពុកទទួលមរណភាពចោលទៀត នៅសល់តែម្តាយចុងប៉ុណ្ណោះ ហើយឥឡូវនេះ ម្តាយចុងក៏មានប្តីថែមទៀតផងដែរ ចំណែកនារីរងគ្រោះនៅតែផ្ទះ មិនបានចេញទៅណាឡើយ សូម្បីតែការសិក្សាក៏មិនបានរៀនដែរ។
នារីម្នាក់ដែលឃើញហេតុការណ៍ បានប្រាប់ថា នៅមុនពេលកើតហេតុ តាំងពីរសៀលថ្ងៃកើតហេតុ មានជនជាតិឥណ្ឌាម្នាក់បាន មកទារលុយនៅផ្ទះកើតហេតុខាងលើ ហើយជនបង្កជាម្តាយបានខឹងនឹងកូនស្រីចុងយកសៀវភៅឱ្យយឺតយ៉ាវពេក ស្របពេលដែលស្ត្រីជាម្ដាយកំពុងធ្វើត្រី មានទាំងកាំបិតនៅនឹងដៃផងនោះ ក៏បានកាប់ទៅលើកូនស្រីចុងមួយកាំបិតប៉័ងតោតែម្តង បណ្តាលឲ្យកាំបិតជាប់ក្បាល ហើយក៏ដកកាំបិតបំរុងកាប់មួយកាំបិតទៀត តែជនរងគ្រោះយកដៃរងជាប់ កុំអីត្រូវមួយកាំបិតទៀតទៅហើយ ខណៈពេលនោះដែរ ជនរងគ្រោះឈាមហូរខ្លាំងពេក ក៏បានយកភួយមកជូតក្បាល និងឈាមហូរប្រឡាក់ឥដ្ឋការ៉ូតែម្តង ។
ប្រភពដដែលបន្តថា ខណៈពេលនោះ ស្ត្រីជាម្តាយចុង និងកូនបង្កើតរបស់គាត់បានជិះម៉ូតូឌុបកូនស្រីចុង ដែលរងរបួសយកទៅព្យាបាល តែដោយសារខ្លាចបងប្អូនប្រជាពលរដ្ឋឃើញ ក៏បានឱ្យជនរងគ្រោះពាក់មួកសុវត្ថិភាពដើម្បីបិទបាំង ប៉ុន្តែចៃដន្យអី មួកសុវត្ថិភាពរបូតធ្លាក់ធ្វើ ឲ្យបងប្អូនប្រជាជនឃើញតែម្តង។ នៅពេលនោះដែរ ស្ត្រីជាម្តាយចុងមិនព្រមចុះរើសទេ គឺបានឱ្យកូនស្រីរបស់គាត់ជាអ្នកបើកម៉ូតូជាអ្នកចុះរើស ហើយស្ត្រីជាម្តាយចុងជាអ្នកអោបពីក្រោយ រួចជិះចេញទៅបាត់ទៅ មិនដឹងថាទៅព្យាបាលរបួស នៅមន្ទីរពេទ្យណាឡើយទេ ។ លុះនៅវេលាម៉ោង ៦ព្រលប់ថ្ងៃដដែល ប្រជាពលរដ្ឋអ្នកជិតខាង នៅតែមិនដឹងដំណឹងជនរងគ្រោះសំរាកព្យាបាលនៅមន្ទីរពេទ្យណា ក៏ប្តឹងសមត្ថកិច្ចឱ្យមកកន្លែងកើតហេតុ ដើម្បីសួរនាំរកជនរងគ្រោះតែម្តង ។
ក្រោយកើតហេតុ សមត្ថកិច្ចនគរបាលប៉ុស្តិ៍កាកាបទី១ បានមកដល់ផ្ទះកើតហេតុ ខាងលើ រួចសាកសួរព័ត៌មាន ហើយក៏បានទាក់ទងទៅឪពុកចុងជនរងគ្រោះ តែឪពុកចុងមិនព្រមប្រាប់ថា ទៅព្យាបាលនៅទីណាទេ គឺគ្រាន់តែប្រាប់ថា ជនរងគ្រោះរងរបួសស្រាលទេ ដោយកំពុងហូបបាយ។ ហើយសមត្ថកិច្ចក៏បានសួរថា យកទៅព្យាបាលនៅមន្ទីរពេទ្យណាមួយ ក៏មិនប្រាប់ដែរ ជាហេតុបណ្តាលឲ្យបងប្អូនប្រជាពលរដ្ឋ មានការសង្ស័យរឹតតែខ្លាំងទៅៗ ដោយមិនដឹងថា ម្តាយចុងរូបនេះយកជនរងគ្រោះ ទៅទម្លាក់នៅកន្លែងណានោះឡើយ ៕
