ភ្នំពេញ៖ ដោយសង្ស័យមានករណីជនជាតិចិន ចាប់ជំរិតជនជាតិចិនដូចគ្នា កម្លាំងកងរាជអាវុធហត្ថខណ្ឌចំការមន សហការជាមួយកម្លាំងកងរាជអាវុធហត្ថរាជធានីភ្នំពេញ បានចុះទៅរំដោះជនជាតិចិន ២នាក់ នៅក្នុងហាងចិនមួយកន្លែង ស្ថិតនៅខាងជើងប៉ុស្តិ៍នគរបាលរដ្ឋបាលទន្លេបាសាក់ ខណ្ឌចំការមន កាលពីម៉ោង១១យប់ ថ្ងៃទី១៩ ខែមករា ឆ្នាំ២០២១ ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ ជនជាតិចិនមួយក្រុម ប្រើរថយន្តមួយគ្រឿង ដឹកជនរងគ្រោះមកដាក់នៅក្នុងហាងខាងលើចំនួន ២ទៅ៣ថ្ងៃមកហើយ ។ លុះមកដល់វេលាម៉ោង ៩យប់ជនសង្ស័យក៏នាំគ្នាបើករថយន្តចេញទៅ ដោយចាក់សោហាងពីខាងក្រៅ។ ចំណែកជនជាតិចិន ២នាក់ជាជនរងគ្រោះនៅខាងក្នុង។ លុះមកដល់វេលាកើតហេតុ ស្រាប់តែមានកម្លាំងកងរាជអាវុធហត្ថ ចុះមកដល់ទីតាំងកើតហេតុហើយបានរំដោះជនរងគ្រោះទាំង ២នាក់យកទៅសួរនាំ។
ពាក់ព័ន្ធនឹងករណីនេះ ពុំទាន់អាចសុំការបំភ្លឺ ពីកម្លាំងកងរាជអាវុធហត្ថបាននោះទេ ដោយគ្រាន់តែសង្ស័យថា ជាករណីជនជាតិចិនចាប់ជំរិត ជនជាតិចិនដូចគ្នាប៉ុណ្ណោះ ៕
