ភ្នំពេញ៖ បន្ទាប់ពីមានគណនីហ្វេសប៊ុកឈ្មោះ Bayon Moto បានយករូបភាពចាស់បង្ហោះ ដោយសរសេរខ្លីថា «តាមចាប់ដល់ក្រោមដី» ក្រុមការងារព័ត៌មាន និងប្រតិកម្មរហ័សនៃ ស្នងការដ្ឋាននគរបាលរាជធានីភ្នំពេញ បានចេញមកបកស្រាយបំភ្លឺ ចំពោះករណីគណនីមួយនេះ បានចុះផ្សាយខុសពីការពិត ដោយបានយករូបភាពមន្ត្រីចរាចរណ៍ ដែលបានចុះជួយសម្រួលចរាចរណ៍ នៅថ្ងៃដាក់ឲ្យប្រើប្រាស់បណ្តោះអាសន្នផ្លូវក្រោមដី រង្វង់មូលចោមចៅកាលពីថ្ងៃទី២៦ ខែតុលា ឆ្នាំ២០២០ ដែលជាក់ស្តែងមិនមែនជាសកម្មភាព ចុះចាប់យានយន្តដូចគណនីហ្វេស បុកនេះចុះផ្សាយនោះទេ ។
ជាមួយគ្នានោះក្រុមការងារព័ត៌មាន និងប្រតិកម្មរហ័សនៃ ស្នងការដ្ឋាននគរបាលរាជធានីភ្នំពេញ ក៏អំពាវនាវឲ្យម្ចាស់គណនីហ្វេសបុក និងហ្វេសបុកផេក ទាំងឡាយ សូមធ្វើការពិនិត្យឲ្យបានគ្រប់ជ្រុងជ្រោយ និងច្បាស់លាស់មុននឹងយករូបភាព របស់សមត្ថកិច្ចមកផុសខុសពីការពិត ដែលធ្វើឲ្យប៉ះពាល់ដល់កិត្តិយស របស់នគរបាលជាតិ ៕
