ភ្នំពេញ៖ ប្រទះឃើញសពស្ត្រីម្នាក់ ទើរលើមែកឈើក្នុងព្រៃ មួយកន្លែង តាមបណ្តោយផ្លូវជាតិលេខ១ ស្ថិតក្នុងភូមិត្នោតច្រុះ ឃុំល្វា ស្រុកព្រះស្តេច ខេត្តព្រៃវែង កាលពីម៉ោង ៥ព្រឹក ថ្ងៃទី៤ ខែមករា ឆ្នាំ២០២១ ។
ចំពោះស្ថានភាពសព ក្បាលបត់ចុះទៅក្រោម ជើងឡើងលើ រាងកាយមានរបួសបែកខ្ទេចផ្ទៃមុខ ចំណែកសម្លៀកបំពាក់រហែករញ៉េរញ៉ៃ ធ្វើឲ្យគេសង្ស័យថា អាចជាករណីឃាតកម្ម ។ សពស្ត្រីរងគ្រោះខាងលើមិនទាន់ស្គាល់អត្តសញ្ញាណនៅឡើយទេ មានវ័យប្រមាណជា៣០ឆ្នាំ ស្លៀកសំពត់កៅស៊ូពណ៌ទឹកក្រូចមានផ្កា ពាក់អាវផ្កាពណ៌ទឹកក្រូច។
ទោះបីជាយ៉ាងណា ក្រោយពីធ្វើការពិនិត្យជុំវិញកន្លែងកើតហេតុ និងសពរួចមក សមត្ថកិច្ចនៅមិនទាន់អាចបញ្ជាក់បាននៅឡើយទេថា ស្ត្រីរងគ្រោះបាត់បង់ជីវិតដោយសារមូលហេតុអ្វី ហើយអត្តសញ្ញាណក៏មិនទាន់បានស្គាល់នៅឡើយ គឺបានត្រឹមតែបញ្ជាក់អោយដឹងថា នឹងយកស្នាមក្រយ៉ៅដៃរបស់សពស្ត្រីរងគ្រោះទៅស្គែនម៉ាស៊ីន នៅស្នងការដ្ឋាននគរបាលខេត្ត ដើម្បីកំណត់អត្តសញ្ញាណ។ ប៉ុន្តែត្រង់ថា ការបាត់បង់ជីវិតនេះគឺជាករណីអ្វីនោះ គឺនៅមិនទាន់អាចបញ្ជាក់បាននៅឡើយទេ ។
លោក ពៅ ជីវី ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តព្រៃវែង បានឲ្យដឹងថា ចំពោះករណីនេះ ខាងមន្ត្រីជំនាញរបស់លោក ក៏ដូចជាខាងក្រុមគ្រូពេទ្យ នៅមិនទាន់អាចបញ្ជាក់បាននៅឡើយទេ ថាជាករណីអ្វីអោយពិតប្រាកដ ដោយលោកសុំពេលវេលាស្រាវជ្រាវបន្ថែមទៀត ពិសេសគឺត្រូវស្រាវជ្រាវរកសាច់ញាតិ និងក្រុមគ្រួសាររបស់ស្ត្រីរងគ្រោះសិន ដើម្បីអោយដឹងថា នៅមុនពេលកើតហេតុ តើស្ត្រីរងគ្រោះមកពីណា ទៅណា ជាមួយអ្នកណា ហើយមានរឿងអ្វីគួរអោយសង្ស័យខ្លះ វាជាពន្លឺងាយស្រួលសម្រាប់បំបែកសំណុំរឿងនេះ ៕
