ភ្នំពេញ៖ មន្ត្រីនគរបាលការពារ គោលដៅសណ្តាប់ធ្នាប់ម្នាក់ រងរបួសយ៉ាងធ្ងន់ធ្ងរ ក្រោយត្រូវរថយន្តពណ៌ត្រេអ៊ី ពាក់ស្លាកលេខ ខ.ម មួយគ្រឿង បានបើកបំបុក ខណៈកំពុងឈរបញ្ជាយានយន្ត គ្រប់ប្រភេទឱ្យឈប់ដើម្បីត្រួតពិនិត្យ សណ្តាប់ធ្នាប់ចរាចរណ៍ ។ ហេតុការណ៍នេះ បានកើតឡើងកាលពីម៉ោង ៥៖១០នាទីព្រឹក ថ្ងៃទី១៦ ខែធ្នូ ឆ្នាំ២០២០ លើកំណាត់ផ្លូវជាតិលេខ៧៨ ត្រង់ចំណុចហួសផ្លូវកែងប្រមាណជាង ៣០០ម៉ែត្រស្ថិតក្នុងភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី។
ជនរងគ្រោះមានឈ្មោះ ព្រំ ចន្ធី ភេទប្រុស អាយុ៥៤ឆ្នាំ មុខរបរនគរបាលការពារសណ្តាប់ធ្នាប់ ។ ចំណែករថយន្តបង្ក ម៉ាកម៉ាស្តា (Masada) ពណ៌ត្រេអ៊ី ពាក់ស្លាក់លេខ ខ.ម 02. 2-1215 អ្នកបើកបរមិនស្គាល់អត្តសញ្ញាណ ។
បើតាមប្រភពព័ត៌មានបានឲ្យដឹងថា មុនពេលកើតហេតុ មន្ត្រីនគបាលដែលរងគ្រោះខាងលើនោះ បានបំពេញការងារឈរឃាត់រថយន្ត គ្រប់ប្រភេទដើម្បីធ្វើការត្រួតពិនិត្យ ស្រាប់តែឃាត់ប៉ះចំរថយន្តមួយគ្រឿង ពណ៌ត្រេអ៊ី ពាក់ស្លាក់លេខ ខេមរភូមិន្ទ តែរថយន្តនោះមិនបានគោរពច្បាប់ចរាចរណ៍ មិនបន្ថយល្បឿនឡើយ គឺបើកសំដៅមកបុកយ៉ាងពេញទំហឹង ទៅលើមន្ត្រីនគរបាលរូបនោះ បណ្តាលឱ្យរងរបួសធ្ងន់ធ្ងរត្រង់ក្បាល និងចង្កេះហើយក៏ត្រូវបានបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកខេត្តភ្លាមៗដែរ ។
បន្ទាប់ពីកើតហេតុភ្លាម រថយន្តបង្កនោះបានបន្ថែមល្បឿនបើកគេច រួចទៅទុករថយន្តប្លុងចោល នៅចំណុចភូមិស្រែប្រវឹក.ស ស្ថិតក្នុងភូមិស្រែអង្ក្រង ឃុំត្រពាំងក្រហម ស្រុកកូនមុំ ខេត្តរតនគិរី ដោយអ្នកបើកបរបានដកសោ រួចរត់គេចខ្លួនបាត់ស្រមោលតែម្តង។
កម្លាំងនគរបាលអធិការដ្ឋាន និងកម្លាំងកងរាជអាវុធហត្ថស្រុកកូនមុំ បានដេញតាមរកឃើញរថយន្តបង្កខាងលើ រួចស្ទូចយកមករក្សាទុកនៅអធិការរដ្ឋាន នគរបាលស្រុកធ្វើកំណត់ហេតុ ដើម្បីរង់ចាំចាត់ការតាមនីតិវិធី ៕
