ភ្នំពេញ៖ រថយន្តសាំងយ៉ុងដឹកពងទា បុកគ្នាជាមួយរថយន្តម៉ាស់ស្ដា បណ្ដាលឲ្យលោកតាវ័យ ៨៦ឆ្នាំម្នាក់ស្លាបបាត់បង់ជីវិត ពេលបញ្ជូនទៅមន្ទីរពេទ្យ និង៤នាក់ទៀតរបួសធ្ងន់ស្រាល ។ ហេតុការណ៍នេះបានកើតឡើង កាលពីម៉ោង ៦៖៣០នាទីព្រឹក ថ្ងៃទី៩ ខែធ្នូ ២០២០ លើផ្លូវក្រាលកៅស៊ូ ត្រង់ចំណុចផ្លូវបំបែកជាបួន ស្ថិតនៅភូមិត្រពាំងដុំ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ ។
បើតាមសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្តចំនួន ២គ្រឿង គឺមុនពេលកើតហេតុ រថយន្តម៉ាកម៉ាស់ស្តា (Mazda) ពណ៌ស ពាក់ផ្លាកលេខ ភ្នំពេញ 2A-2877 បើកបរដោយឈ្មោះ នូ ភារម្យ ភេទប្រុស អាយុ៥៨ឆ្នាំ ជនជាតិខ្មែរ នៅភូមិសួងលិច សង្កាត់សួង ក្រុងសួង ខេត្តត្បូងឃ្មុំ (របួសធ្ងន់) ដឹកមនុស្សចំនួន៣នាក់ ក្នុងនោះរួមមាន ១-ឈ្មោះ ជា លាងយ៉េង អាយុ៥៦ឆ្នាំ ជនជាតិខ្មែរនៅភូមិសួងលិច សង្កាត់សួង ក្រុងសួង ខេត្តត្បូងឃ្មុំ (របួសស្រាល) ២-ឈ្មោះជា ហ៊ាង ភេទស្រី អាយុ១២ឆ្នាំ ជនជាតិខ្មែរ នៅភូមិវាលតូច ឃុំសេដា ស្រុកតំបែរ ខេត្តត្បូងឃ្មុំ (របួសស្រាល) ។ ៣-ឈ្មោះប៊ុន ជាង ភេទប្រុស អាយុ៨៦ឆ្នាំ ជនជាតិខ្មែរ នៅភូមិវាលតូច ឃុំសេដា ស្រុកតំបែរ ខេត្តត្បូងឃ្មុំ (ស្លាប់តាមផ្លូវពេលបញ្ជូនទៅមន្ទីរពេទ្យ ត្បូងឃ្មុំ ។ បង្កជាមួយរថយន្តសាំងយ៉ុងពណ៌ស ពាក់ផ្លាកលេខ ភ្នំពេញ 2-7450 បើកបរដោយឈ្មោះ ស្រឿន ភេទប្រុស អាយុ៤០ឆ្នាំ ជាតិខ្មែរនៅភូមិកញ្ចំ ឃុំកញ្ចំ ស្រុកពារាំង ខេត្តព្រៃវែង ( របួសធ្ងន់) ។
រថយន្តម៉ាកម៉ាស់ស្តា បើកបរពីលិចទៅកើតក្នុងផ្លូវបាត់សិទ្ធិ ខណៈរថយន្តម៉ាកសាំងយ៉ុង បើកបរមកពីត្បូងទៅជើង ក៏ជ្រុលទៅបុករថយន្តម៉ាកម៉ាស់ស្តារ បណ្ដាលរថយន្តទាំង ២គ្រឿងខូចខាតកម្រិតធ្ងន់ ។ មូលហេតុ មិនគោរពសិទ្ធិអាទិភាព ។
ចំពោះរថយន្តទាំង២គ្រឿង ត្រូវបានកម្លាំងជំនាញយកមករក្សាទុក នៅអធិការរដ្ឋាននគរបាលស្រុកត្បូងឃ្មុំ ដើម្បីដោះស្រាយតាមនីតិវិធី ៕
