ភ្នំពេញ៖ យុវជន ៣នាក់ បានតេណាត់អតីតសង្សារស្រី ឲ្យមកយកទូរស័ព្ទ ពេលនោះនាងក៏បាន ឲ្យគូដណ្ដឹងជិះម៉ូតូឌុបទៅយក ស្រាប់តែកំពុងជិះម៉ូតូ ជនសង្ស័យបានជិះម៉ូតូមួយគ្រឿងទៀត មកទន្ទឹមគ្នារួចក៏ធាក់ម៉ូតូជនរងគ្រោះ បណ្ដាលឲ្យដួលតែម្ដង ។ ហេតុការណ៍នេះ កើតឡើងកាលពីថ្ងៃទី៨ ខែធ្នូ ឆ្នាំ២០២០ នៅចំណុចផ្លូវបេតុងស្ថិតក្នុងភូមិព្រែកអញ្ចាញ សង្កាត់ព្រែកឫស្សី ក្រុងតាខ្មៅ ខេត្តកណ្តាល ។
ជនរងគ្រោះមានឈ្មោះ រ៉ាន់ សុរ៉ាត់ ភេទប្រុស អាយុ១៦ឆ្នាំ ទីលំនៅភូមិព្រែកអញ្ចាញ សង្កាត់ព្រែកឫស្សី ក្រុងតាខ្មៅ ខេត្តកណ្តាល មុខរបរ ព្រូឡានដឹកដី (រងរបួសបាក់ភ្លៅឆ្វេង និងរលាត់ជង្គង់ កដៃ ទ្រូង ចង្ការ និងក) ។ និងឈ្មោះ ឆៃណា សុជាតា ភេទស្រី អាយុ១៦ឆ្នាំ ទីលំនៅភូមិព្រែកតាឡុង៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរនៅផ្ទះ (រងរបួសស្នាម និងថ្គាមខាងឆ្វេង និងភ្នែកគោលទាំងសងខាង) ។
ចំណែកជនបង្កមានគ្នា ៣នាក់ ១.ឈ្មោះ ផាត់ សុវណ្ណថេត ភេទប្រុស អាយុ១៥ឆ្នាំ មានទីលំនៅភូមិស្ទឹងជ្រៅ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាកដ រងរបួសរលាត់ប្រអប់ជើង ជង្គង់ និងដៃខាងឆ្វេង (ឃាត់ខ្លួន) ។ ២.ឈ្មោះ មី ភេទប្រុស អាយុ១៦ឆ្នាំ មានទីលំនៅភូមិព្រែកតាពៅ១ សង្កាត់ ដើមមៀន ក្រុងតាខ្មៅ ខេត្តកណ្តាល មុខរបរ មិនពិតប្រាកដ (គេចខ្លួន) ។ ៣.ឈ្មោះ មករា ភេទប្រុស អាយុ១៦ឆ្នាំ មានទីលំនៅភូមិស្ទឹងជ្រៅ សង្កាត់ដើមមឿន ក្រុងតាខ្មៅ ខេត្តកណ្តាល មុខរបរមិនពិត(គេចខ្លួន) ។
បើតាមប្រភពព័ត៌មាន បានឲ្យដឹងថា មុនកើតហេតុជនរងគ្រោះ ២នាក់គូដណ្តឹង បាននឹងកំពុងជិះម៉ូតូឌុបគ្នា ចេញពីផ្ទះម្តាយមីង ពេលនោះស្រាប់តែជនសង្ស័យឈ្មោះ មី ដែលអតីតជាសង្សារ របស់ជនរងគ្រោះឈ្មោះ ឆៃណា សុជាតា បានទូរស័ព្ទណាត់ឲ្យនាង ទៅយកទូរស័ព្ទនៅមុខសាលាស្ទឹងជ្រៅ ។ លុះពេលទៅដល់កន្លែងកំណត់ឈ្មោះ មី បានតេឲ្យទៅជួបនៅម្តុំគល់ស្ពានព្រែកឫស្សីវិញ ពេលនោះជនរងគ្រោះទាំង២នាក់ក៏បានជិះម៉ូតូទៅដល់ ចំណុចកើតហេតុខាងលើ ស្រាប់តែឃើញក្រុមជនសង្ស័យទាំង ៣នាក់ខាងលើជិះម៉ូតូ១គ្រឿង ម៉ាកសង់ប៊ិច ពណ៌ខ្មៅ មិនចាំផ្លាកលេខ បានតាមមកពីក្រោយ ដោយជនសង្ស័ យឈ្មោះ ផាត់ សុវណ្ណថេត ជាអ្នកបើកឈ្មោះ មី អង្គុយកណ្តាល ឯឈ្មោះ មករា អង្គុយខាងក្រោយ ពេលជិះមកដល់ទន្ទឹម និងជនរងគ្រោះ ស្រាប់តែឈ្មោះមី ដែលអង្គុយកណ្តាលបានធាក់ម៉ូតូ ជនរងគ្រោះដួលផ្ទប់ទៅនិងរបងផ្ទះ បណ្តាលឲ្យរងរបួស រីឯម៉ូតូជនសង្ស័យក៏បាន ដួលដែរនឹងរងរបួសម្នាក់ទៀតផង ។
ភ្លាមនោះជនសង្ស័យឈ្មោះ មី និងឈ្មោះ មករា បានលើកម៉ូតូជិះគេចខ្លួនបាត់ទៅ ចំណែកជនសង្ស័យម្នាក់ឈ្មោះ ផាត់ សវណ្ណថេត (របួស) ឡើងជិះម៉ូតូមិនទាន់គេ ត្រូវបានសមត្ថកិច្ចនគរបាល ប៉ុស្តិ៍ព្រែកឫស្សីធ្វើការឃាត់ខ្លួននឹងបាននាំយកទៅសាកសួរនៅប៉ុស្តិ៍ រួចបញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីបន្តនីតិវិធី ៕
