ភ្នំពេញ៖ ជនជាតិចិនមួយក្រុម កាច់កសម្លាប់ជនជាតិចិនដូចគ្នា នៅកាស៊ីណូជៀឡុងជូរ ស្ថិតក្នុងក្រុម៨ ភូមិ៦ សង្កាត់៤ ក្រុងព្រះសីហនុ រួចយកសពទៅប្លុងចោលក្នុងរថយន្ដមួយគ្រឿង ម៉ាក Highlander ពណ៌ស ពាក់ផ្លាកលេខភ្នំពេញ2AC-3012 នៅបណ្ដោយវិថីលេខ៨៣៥ ម្ដុំគោលដៅP12 ស្ថិតក្នុងភូមិ៦ សង្កាត់លេខ៤ ក្រុងព្រះសីហនុ។
យោងតាមស្នងការនគរបាលខេត្តព្រះសីហនុ បានឲ្យដឹងនៅព្រឹកនៅថ្ងៃទី០៤ ខែធ្នូ ឆ្នាំ២០២០នេះថា ករណីឃាតកម្មនេះ បានកើតឡើងនៅវេលាម៉ោង០៨៖៣០នាទីយប់ ថ្ងៃទី២៩ ខែវិច្ឆិកា ឆ្នាំ២០២០។ ក្រោយទទួលបានព័ត៌មាន លោកបានបញ្ជាកម្លាំងជំនាញ បើកការស្រាវជ្រាវជាបន្ទាន់។
ជាលទ្ធផលនៅព្រឹកថ្ងៃទី០១ ខែធ្នូ ឆ្នាំ២០២០ កម្លាំងជំនាញ នៃស្នងការដ្ឋាននគរបាលខេត្ដព្រះសីហនុ បានឃាត់ខ្លួនជនសង្ស័យឈ្មោះ LI FENG អាយុ៣៥ឆ្នាំ ជាសន្ដិសុខកាស៊ីណូជៀវឡុងជូរ ស្នាក់នៅកាស៊ីណូជៀវឡុងជូរ ស្ថិតក្នុងក្រុម៨ ភូមិ៦ សង្កាត់លេខ៤ ក្រុងព្រះសីហនុ ខណៈពេលជននេះ និងបក្ខពួកបម្រុងគេចខ្លួនពីកន្លែងស្នាក់នៅ។
ក្រោយពេលសាកសួរ និងតាមការចង្អុលបង្ហាញពីសាក្សី ជនសង្ស័យខាងលើជាប់ពាក់ព័ន្ធនឹងករណី ឃាតកម្ម កាលពីថ្ងៃទី២៩ ខែវិច្ឆិកា ឆ្នាំ២០២០ នៅកាស៊ីណូជៀវឡុងជូរ ដោយរូបគេ និងបក្ខពួកបានយកសាកសព ចុះពីជាន់លើ នៃកាស៊ីណូ ចុះមកក្រោមដាក់ចូលក្នុងរថយន្ដម៉ាក Highlander ពណ៌ស ពាក់ផ្លាកលេខភ្នំពេញ2AC-3012 យកទៅប្លុងចោល។
លុះនៅរសៀលថ្ងៃទី០១ ខែធ្នូ កម្លាំងជំនាញ នៃស្នងការដ្ឋាននគរបាលខេត្ដ បន្ដប្រតិបត្ដិការដោយមានការដឹកនាំ និងសម្របសម្រួលនីតិវិធីពីលោក ពេញ ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្ដព្រះសីហនុ បានសហការជាមួយកម្លាំង ជំនាញអធិការដ្ឋាន នគរបាលក្រុងព្រះសីហនុ ចុះទៅកាន់ទីតាំង កាស៊ីណូជៀវឡុងជូរ (កន្លែងកើតហេតុ)។
ជាលទ្ធផលសមត្ថកិច្ចបានឃាត់ខ្លួន ជនសង្ស័យ ក្នុងករណីនេះសរុបចំនួន០៣នាក់ ជនជាតិចិន០៣នាក់ (ស្រីម្នាក់) ដែលក្នុងនោះមាន៖ ទី១៖ឈ្មោះ Li Feng អាយុ៣៥ឆ្នាំ មុខរបរសន្ដិសុខកាស៊ីណូ, ទី២៖ឈ្មោះ Yu Yan Long អាយុ៣៥ឆ្នាំ មុខរបរសន្ដិសុខកាស៊ីណូ និងទី៣៖ឈ្មោះ Tu Lin ភេទស្រី អាយុ៤៣ឆ្នាំ មុខរបរអ្នកគ្រប់គ្រងបុគ្គលិកជនជាតិចិន។
ក្នុងប្រតិបត្តិការនេះ កម្លាំងជំនាញដកហូតបាន រថយន្ដ០១គ្រឿងម៉ាក Highlander ពណ៌ស ពាក់ផ្លាកលេខភ្នំពេញ 2AC-3012 (មធ្យោបាយធ្វើសកម្មភាព), ក្បាលឌីវីអ័រ ចំនួន០២គ្រឿង, ហាតឌីស ចំនួន០១គ្រឿង, ទូរស័ព្ទដៃចំនួន០៣គ្រឿង, លិខិតឆ្លងដែនចំនួន០២ក្បាល, កាបូបស្ពាយពណ៌ខ្មៅចំនួន០១, រថយន្ដ០១គ្រឿងស្ដារិក ពណ៌ខ្មៅ ពាក់ផ្លាកលេខភ្នំពេញ 2AZ-9280។ បច្ចុប្បន្នជនសង្ស័យរួមទាំងសម្ភារវត្ថុតាង សមត្ថកិច្ចជំនាញ នៃស្នងការដ្ឋាននគរបាលខេត្ដព្រះសីហនុ កំពុងបំពេញនីតិវិធីដើម្បីបញ្ជូនទៅកាន់សាលាដំបូងខេត្ដចាត់ការបន្ដតាមផ្លូវច្បាប់៕
