ភ្នំពេញ៖ នេះជារឿងមួយដ៏គួរឲ្យសង្វេគណាស់ ឪពុកទៅដាក់បង្កៃ និងនាំកូនស្រី ២នាក់ទៅជាមួយ ដោយជាប់រវល់កូនទាំង ២នាក់ចុះលេងទឹក បណ្តាលឲ្យលង់ស្លាប់ម្នាក់ និងម្នាក់ទៀតកំពុងសង្គ្រោះនៅមន្ទីរពេទ្យ ។ ករណីក្មេងលង់ទឹកនេះ កើតឡើងកាលពីម៉ោង ១៦និង០០នាទី ថ្ងៃទី១៩ ខែវិច្ឆិកា ឆ្នាំ២០២០ នៅត្រង់ចំណុចអូរស្ងួតចម្ងាយប្រហែល ១គីឡូម៉ែត្រ ខាងកើតភូមិអូរដង្កោ ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ ។
លោកអធិការនគរបាល ស្រុកមង្គលបូរីបានប្រាប់ថា ក្មេងរងគ្រោះទាំង ២នាក់មានឈ្មោះ ខន សុខលាង អាយុ៧ឆ្នាំ ជាកូនស្រីបងដោយសារ អាការៈធ្ងន់ធ្ងរពេក គ្រូពេទ្យមិនអាចជួយសង្គ្រោះបាន ។ ចំណែកប្អូនស្រីឈ្មោះ ខន សុខលីន អាយុ២ឆ្នាំ ត្រូវបានក្រុមគ្រួសារយក ទៅសង្គ្រោះបន្ទាន់នៅមន្ទីរពេទ្យធំស្រុកមង្គលបូរី ។
លោកអធិការនគរបាលស្រុកមង្គលបូរី បានប្រាប់ឲ្យដឹងបន្តទៀតថា នៅមុនពេលកើតហេតុ ឪពុកបានទៅដាក់បង្កៃ នៅចំណុចខាងលើហើយបាន យកកូនស្រីទាំង ២នាក់ទៅផង ស្របពេលនោះ ឪពុកបានឆ្លងប្រឡាយទៅដាក់បង្កៃ ដោយទុកកូននៅម្ខាងប្រឡាយ លុះដាក់បានប្រហែល ៣០បង្កៃ ឃើញកូនលង់ទឹកក៏ស្ទុះរត់ទៅជួយស្រង់ យកមកផ្ទះរួចក៏បញ្ជូនទៅ ពេទ្យមិត្តភាពកម្ពុជាជប៉ុនស្រុកមង្គលបូរី ។ ក្រោយពេលដែលក្រុមគ្រូពេទ្យជួយសង្គ្រោះ យ៉ាងយកចិត្តទុកដាក់រួចមក ប្អូនស្រីឈ្មោះ ខន សុខលីន សង្គ្រោះបានរួចផុតពីសេចក្តីស្លាប់ ចំណែកឈ្មោះ ខន សុខលាង អាយុ៧ឆ្នាំ ជាបងស្រីបានស្លាប់ ។
សពត្រូវបានក្រុមគ្រួសារ យកមកធ្វើបុណ្យតាមប្រពៃណី ៕
