ភ្នំពេញ៖ បុរសជាមេការផ្នែកប្រព័ន្ធលូម្នាក់ បានស្លាប់បាត់បង់ជីវិតភ្លាមៗ ក្រោយត្រូវរថយន្តដឹកដីខ្សាច់ ក្នុងក្រុមហ៊ុនជាមួយគ្នាកិនបែកក្បាល ខណៈពេលដែលជនរងគ្រោះ ជិះម៉ូតូទៅទិញបាយហូប ។ ហេតុការណ៍នេះ បានបង្កការភ្ញាក់ផ្អើល កាលពីម៉ោង ៦៖៤០នាទី ព្រឹកថ្ងៃទី១៧ ខែវិច្ឆិកា ឆ្នាំ២០២០ នៅតាមផ្លូវបេតុង ក្នុងតំបន់អភិវឌ្ឍន៍ របស់ក្រុមហ៊ុន OCIC នៅភូមិដើមគរ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
ជនរងគ្រោះមានឈ្មោះ យ៉ែម វណ្ណា ភេទប្រុស អាយុ៤៥ឆ្នាំ ជាមេការផ្នែកប្រព័ន្ធលូរបស់ក្រុមហ៊ុន OCIC ស្នាក់នៅក្នុងការដ្ឋានក្បែរកន្លែងកើតហេតុ និងមានស្រុកកំណើតនៅភូមិបារាយណ៍ សង្កាត់បារាយណ៍ ក្រុងព្រៃវែង ខណ្ឌព្រៃវែង ។ ចំណែករថយន្តមួយគ្រឿងខាងលើ ម៉ាកហ៊ីយ៉ាន់ដាយ ពណ៌ឈាមជ្រូក ពាក់ស្លាកលេខ ភ្នំពេញ ៣E-៨៨១៤ បើកបរដោយបុរសម្នាក់មិនស្គាល់អត្តសញ្ញាណ គឺជាអ្នកស្គាល់គ្នាជាមួយនឹងជនរងគ្រោះ បានរត់គេចខ្លួនបាត់។
បើតាមប្រភពព័ត៌មាន ពីកន្លែងកើតហេតុបានឲ្យដឹងថា នៅមុនពេលកើតហេតុ ជនរងគ្រោះបានជិះម៉ូតូ មួយគ្រឿងម៉ាកហុងដា ធុនសេ១២៥ ពាក់ស្លាកលេខ ព្រៃវែង ១R-៣៤៨២ ចេញពីកន្លែងស្គេនមេដៃ ហើយបានធ្វើដំណើរតាមផ្លូវបេតុង ក្នុងទិសដៅពីកើតទៅលិច ក្នុងគោលបំណងទៅទិញបាយហូប ។ ខណៈពេលជនរងគ្រោះកំពុងជិះម៉ូតូតាមផ្លូវ ស្រាប់តែមានរថយន្តដឹកខ្សាច់ មួយគ្រឿងខាងលើ បើកបរដោយអ្នកស្គាល់គ្នា ក៏បានចុចស៊ីផ្លេទំនងជាលេងសើច ជាហេតុធ្វើអោយជនរងគ្រោះភ្ញាក់ ក៏បានរេចង្កូតទៅខាងស្តាំដៃ ឡើងចិញ្ចើមផ្លូវក្រឡាច់ដួល ហើយគាប់ជួនពេលនោះរថយន្តដឹកខ្សាច់មកដល់ក៏កិនបែកក្បាល បណ្តាលឱ្យបាត់បង់ជីវិត យ៉ាងអាណោចអាធ័មទាំងព្រឹកតែម្តង ។
ក្រោយកើតហេតុ សពត្រូវបានស្ត្រីជាភរិយា និងបងប្អូនបានហៅរថយន្ត មកដឹកបញ្ជូនទៅកាន់ស្រុកកំណើត ដើម្បីធ្វើបុណ្យតាមប្រពៃណី ។ ចំណែករថយន្ត និងម៉ូតូត្រូវនគរបាលចរាចរណ៍ ចុះមកធ្វើការវាស់វែងរួចបញ្ជូនទៅកាន់ ការិយាល័យចរាចរណ៍ផ្លូវគោក ដើម្បីរង់ចាំធ្វើការដោះស្រាយនៅពេលក្រោយទៀត ៕
