ភ្នំពេញ៖ ប្រើកូនទៅស្រាផឹក កូនមិនទៅ ទាញដំបងវាយកូន ពេលប្រពន្ធសួរនាំ ក៏ទាញដំបងវាយប្រពន្ធដួលទៀត ប្អូនថ្លៃឃើញក៏ទាញកាំបិតបុ័ងតោ កាប់រងរបួសធ្ងន់ ។ ហេតុការណ៍នេះ កើតឡើងកាលពីម៉ោង ១១៖៣០នាទី ថ្ងៃទី២៨ ខែតុលា ឆ្នាំ២០២០ នៅចំការម្លិះ នាភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។
អ្នករងរបួសទី១ឈ្មោះ យាំ សេងលី ភេទប្រុស អាយុ៤០ឆ្នាំ។ ទី២ជាប្រពន្ទ យាំ សេងលី និងទី៣ជាកូន។ មូលហេតុដែលនាំឲ្យកើត ជាអំពើហឹង្សាក្នុងគ្រួសារនេះ គឺផ្តើមឡើងដោយជនរងគ្រោះ ឈ្មោះយាំ សេងលី បានប្រើកូនប្រុសឲ្យទៅទិញស្រា ប៉ុន្តែកូនប្រុសមិនទៅក៏ទាញ ដំបងវាយកូន។
ពេលនោះប្រពន្ធឃើញ ក៏សួរនាំ ធ្វើឲ្យឈ្មោះ យាំ សេងលី ទាញដំបងវាយប្រពន្ធចំចង្កេះបណ្តាលឲ្យដួល។ ឃើញដូច្នេះឈ្មោះ ខាត់ ឌួក ភេទប្រុស អាយុ២០ឆ្នាំ ដែលត្រូវជាប្អូនថ្លៃ យាំ សេងលី ឃើញយាំ សេងលី វាយក្មួយ និងបងស្រីនៅនឹងមុខបែបនេះ ក៏ទាញកាំបិតបុ័ងតោ កាប់ទៅលើ យាំ សេងលី ត្រូវចំសៀតថ្កា ខាងឆ្វេង និងក ដៃឆ្វេង រួចគេចខ្លួនបាត់។ បានមួយសន្ទុះនគរបាល ប៉ុស្តិ៍ព្រែកថ្មី បានតាមចាប់ខ្លួនជនបង្ករួចបញ្ជូនអ្នករងគ្រោះទៅធ្វើការសង្គ្រោះ នៅមន្ទីរពេទ្យបង្អែក ខណ្ឌច្បារអំពៅ។ ចំណែកជនបង្កត្រូវ បញ្ជូនទៅតុលាការ ៕
