ភ្នំពេញ៖ នាល្ងាចថ្ងៃទី២៥ ខែតុលា ឆ្នាំ២០២០ នៅឃុំត្រពាំងធំ ស្រុកបាគង ខេត្តសៀមរាប ឃាតករតាមដងផ្លូវ (គ្រោះថ្នាក់ចរាចរណ៍) បានសម្លាប់យុវជនដ៍ក្លាហានមួយរូបជាមន្ត្រីជំនាញកំចាត់មីន នៃអង្គភាពស៊ីម៉ាក់ឈ្មោះ ស៊ា គឹមសៀង ។
លោក ហេង រតនា អគ្គនាយកស៊ីម៉ាក់ បានសរសេរលើហ្វេសប៊ុក នៅថ្ងៃទី២៦ តុលានេះថា ចន្លោះឆ្នាំឆ្នាំ១៩៩៣-១៩៩៨ គ្រាប់មីននិងសំណល់ជាតិផ្ទុះ ពីសង្គ្រាមបានសម្លាប់ និងធ្វើឱ្យរងរបួសប្រជាជនកម្ពុជា ប្រមាណជាង ៤.០០០នាក់ ក្នុងមួយឆ្នាំៗ ដែលក្លាយជាឃាតកលេខ១ នៅកម្ពុជា បើទោះបីជា ការបោះឆ្នោតកើតឡើងនៅឆ្នាំ១៩៩៣ ក៏ដោយតែសង្គ្រាមនៅតែ បន្តរហូតចុងឆ្នាំ១៩៩៨ ។ អង្គភាពស៊ីម៉ាក់ ជាកំលាំងស្នូលនៃការកំចាត់ឃាតករនេះ ដែលធ្វើឱ្យជនរងគ្រោះធ្លាក់ចុះ មានចំនួនតិចជាង ១០០នាក់ក្នុងមួយឆ្នាំៗ (២០១៩)។
លោកបន្តថា បច្ចុប្បន្ននេះ ដោយសារភាពរីកចម្រើន ខាងមធ្យោបាយដឹកជញ្ជូន និងការអភិវឌ្ឍេហេដ្ឋារចនាសម្ពន្ធ័នោះ ឃាតករតាមដងផ្លូវ (ចរាចរណ៍) បានក្លាយយមរាជលេខ១វិញម្តង ក្នុងការឆក់យកជីវិតប្រជាជនកម្ពុជា ។
លោក ហេង រតនា ក៏បានអំពាវនាវឲ្យ ប្រជាពលរដ្ឋទាំងអស់គ្នា ចូលរួមគោរពច្បាប់ចរាចរណ៍ ដើម្បីសុវត្ថិភាពខ្លួនឯងផង និងអ្នករួមដំណើរលើដងផ្លូវផង ។
ជាមួយគ្នានោះលោកបន្ថែមថា អង្គភាពពិតជាមានការសោកស្តាយណាស់ចំ ពោះការបាត់បង់ធនធានមនុស្ស ជាអ្នកបន្តវេននេះ និងសូមចូលរួមសោកស្តាយបំផុត ជាមួយគ្រួសារសពនិងសូមវិញ្ញាណខន្ត ស៊ា គឹមសៀង បានទៅកាន់ទីសុខន្តិភពកុំបីឃ្លៀងឃ្លាតឡើយ ៕
