ភ្នំពេញ៖ ឈ្លោះប្រកែកជាមួយប្រពន្ធបន្តិចបន្តួច បុរសម្នាក់ខឹងចិត្ត ជិះម៉ូតូស្កាត់ពីខេត្តកំពង់ធំ មកដល់ភ្នំពេញ ដើម្បីទៅរកសេវាផ្លូវភេទនៅវត្តភ្នំ រួចនាំនាងចូលផ្ទះសំណាក់ ពេលដេកលក់ស្រាប់តែនាងលួចយកម៉ូតូមួយគ្រឿងទៅបាត់ ។ ហេតុការណ៍នេះបង្កឲ្យមានការផ្អើល កាលពីម៉ោង ៨៖៣០នាទីយប់ ថ្ងៃទី១៩ ខែតុលា ឆ្នាំ២០២០ តាមតាមបណ្តោយផ្លូវទំនប់៧០ នៅចំណុចក្បែរស្តុបR៦ ស្ថិតក្នុងសង្កាត់ស្រះចក ខណ្ឌដូនពេញ ។
បើតាមប្រពន្ធជនរងគ្រោះ បានរៀបរាប់ដឹងថា ប្តីរបស់គាត់មានឈ្មោះ ផុន វទ្ធី អាយុ២៥ ទៅ២៦ឆ្នាំ មានមុខរបរជាចុងភៅ ស្នាក់នៅបច្ចុប្បន្ននៅខេត្តកំពង់ធំ ដោយមុនពេលកើតហេតុ កាលពីម្សិលមិញ ប្តីរបស់គាត់បានឈ្លោះគ្នាជាមួយរូបគាត់ ហើយប្តីខឹងគាត់ក៏បានជិះម៉ូតូមួយគ្រឿង ម៉ាកហុងដាឌ្រីម ពណ៌ខ្មៅ សេសេរី២០២០ ពាក់ស្លាកលេខភ្នំពេញ 1IB-2276 បើកចេញមកពីខេត្តកំពង់ធំមកដល់ភ្នំពេញ ដោយមិនដឹងថា ជាយ៉ាងម៉េចនោះទេ បានជាបាត់ម៉ូតូបែបនេះ ស្ត្រីជាប្រពន្ធបន្តទៀតថា ពេលគាត់សួរនាំប្តី ក៏បាននិយាយថាពេលប្តីខឹងគាត់បានជិះម៉ូតូ មកដល់ភ្នំពេញផឹកស៊ីស្រវឹង រួចទៅរកសេវាផ្លូវភេទនៅវត្តភ្នំ ក៏ជួបនឹងស្ត្រីម្នាក់ជាជនសង្ស័យ តែប្តីរបស់គាត់អត់មានលុយ ដេកផ្ទះសំណាក់ក៏ឱ្យស្ត្រីជនសង្ស័យ ជួយរកផ្ទះសំណាក់ឱ្យដេក ដោយបញ្ចាំម៉ូតូចំនួន ២០ដុល្លារ ដើម្បីដោះទាល់មួយគ្រាសិន។
ស្ត្រីជាប្រពន្ធរៀបរាប់ទៀតថា តែប្តីរបស់គាត់បានបញ្ជាក់ថា មិនបានដេកជាមួយស្ត្រីជាសង្ស័យនោះទេ លុះពេលទៅដល់ដេកលក់មួយភាំងដឹងខ្លួនវិញ ស្រាប់តែបាត់ម៉ូតូតែម្តង គឺជនសង្ស័យបានហៅបក្សពួកមកយកម៉ូតូទៅបញ្ចាំមួយកន្លែងទៀតក្នុងតំលៃ ១៥០$ រួចហើយគេចខ្លួនបាត់ស្រមោល ទាល់តែគាត់និងប្តីដើរតាមរកក៏ឃើញជនសង្ស័យ ក៏ប្តឹងសមត្ថកិច្ចតែម្តង ។
បើតាមសម្តីស្ត្រីរកស៊ីផ្លូវភេទ ដែលជាប់សង្ស័យមានឈ្មោះ សំអាត អាយុជាង៣០ឆ្នាំ ស្នាក់នៅបន្ទប់ជួលគ្មានលេខ ក្នុងខណ្ឌដូនពេញ បានរៀបរាប់ប្រាប់ឱ្យដឹងថា មុនពេលកើតហេតុ រូបគាត់ជាអ្នករកស៊ីផ្លូវភេទនៅម្តុំវត្តភ្នំ ប៉ុន្តែជនរងគ្រោះបានមកបបួលខ្លួន ទៅដេកជាមួយក្នុងតំលៃ ១០ម៉ឺនរៀល តែជនរងគ្រោះប្រាប់ថា អត់មានលុយចូលផ្ទះសំណាក់នោះទេ។ ស្ត្រីរកស៊ីផ្លូវភេទបន្តថា ពេលនោះក៏យកម៉ូតូទៅបញ្ចាំក្នុងតម្លៃ២០ដុល្លារ ដើម្បីយកលុយទៅដេកផ្ទះសំណាក់ ខណៈពេលទៅដេកផ្ទះសំណាក់ ជនរងគ្រោះបានយកថ្នាំប្រភេទម៉ាទឹកកក យកទៅប្រើប្រាស់ជាមួយរូបគាត់ រួចហើយទើបដេកជាមួយគ្នាបានម្តង ស្រាប់តែចោទថា រូបគាត់ថាឱ្យបក្សពួកឈ្មោះខ្មៅ យកម៉ូតូទៅបញ្ចាំ ១៥០ ដុល្លារទៅវិញ ។
ក្រោយពេលកើតហេតុ សមត្ថកិច្ចក៏បានធ្វើការឃាត់ខ្លួន ជនសង្ស័យខាងលើនេះ ដើម្បីយកទៅកាន់ប៉ុស្តិ៍រដ្ឋបាលស្រះចក ដើម្បីសាកសួរ និងចាត់ការទៅតាមនីតិវិធីបន្តទៀត ៕
