ភ្នំពេញ៖ បុរសជាកម្មករហាងនំម្នាក់ ត្រូវកម្មករដូចគ្នា យកញញួរមកវាយក្បាល បណ្តាលឲ្យរងរបួសធ្ងន់រហូតដល់ស្លាប់ ចោលកូនប្រុសដែលកំពុងពរនៅដៃ ។ ហេតុការណ៍នេះ បានកើតឡើងនៅវេលាម៉ោង ៧៖៥៨នាទី ថ្ងៃទី៧ ខែតុលា ឆ្នាំ២០២០ នៅចំណុចហាងលក់នំយីហោផ្ទះនំខេក ទីតាំងលេខ៧៥២ ផ្លូវជាតិលេខ៥ ភូមិក្រោលគោ សង្កាត់គីឡូម៉ែត្រ៦ ខណ្ឌឬស្សីកែវ។
ជនសង្ស័យឈ្មោះ ផល បញ្ញា ភេទប្រុស អាយុ៣១ឆ្នាំ មុខរបរកម្មករហាងនំ ទីលំនៅភូមិកោះរះ ឃុំកោះរះលើ ស្រុកល្វាឯម ខេត្តកណ្តាល ស្នាក់នៅកន្លែងកើតហេតុខាងលើ (រត់គេចខ្លួន)។
សាកសពឈ្មោះ ហន ចាន់រស្មី ភេទប្រុស អាយុ៣០ឆ្នាំ មុខរបរកម្មករហាងនំ ទីលំនៅភូមិអណ្តូងទឹក ឃុំអណ្តូងទឹក ស្រុកបុទុមសាគរ ខេត្តកោះកុង ស្នាក់នៅកន្លែងកើតហេតុខាងលើ។
ស្លាកស្នាមនៅលើខ្លួនសព៖ ស្នាមជាំហើមពោរដាច់រយះទួកសាច់ នៅក្បាលខាងក្រោយចំនួន ២កន្លែង។
យោងតាមការបំភ្លឺពីបុរសម្នាក់សុំមិនបញ្ចេញឈ្មោះ ជាកម្មករធ្វើនំបានអោយដឹងថា នៅម៉ោង០៧:០០នាទី ថ្ងៃទី០៧ ខែតុលា ឆ្នាំ២០២០ រូបគេបានចូលក្នុងបន្ទប់កាត់នំតែម្នាក់ឯង លុះនៅម៉ោងកើតហេតុខាងលើ រូបគេបានឮសំលេងកូនប្រុស ជនរងគ្រោះស្រែកយំខ្ញុំ ក៏អើតមើលតាមបង្អួច ឃើញជនសង្ស័យកំពុង យកញញួរវាយក្បាលជនរងគ្រោះ រួចដើរចេញទៅក្រៅជិះម៉ូតូចេញទៅបាត់ ហើយរងគ្រោះត្រូវបានដឹកទៅសង្គ្រោះនៅមន្ទីរពេទ្យក្រោយមកទើបដឹងថា ស្លាប់ ។
យោងតាមកាំមេរ៉ាសុវត្ថិភាព វេលាម៉ោង ៧:៥៨នាទី ថ្ងៃទី៧ ខែតុលា ឆ្នាំ២០២០ ជនរងគ្រោះបានពរកូនប្រុសដើរ ចុះតាមជណ្តើរមកដល់ខាងក្រោម ស្រាប់តែជនសង្ស័យបាន ស្ទុះទាញញញួរមកវាយក្បាលជនរងគ្រោះពីក្រោយ រួចដើរចេញទៅក្រៅជិះម៉ូតូគេចខ្លួន។
សពត្រូវបានសមត្ថកិច្ច ប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី ៕
