ភ្នំពេញ៖ បុរសវ័យចំណាស់ម្នាក់ត្រូវបានគេប្រទះឃើញចងកសម្លាប់ខ្លួនភ្ជាប់ជាមួយនឹងផាសអាប់របស់ខ្លួនដោយមិនដឹងមូលហេតុបង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចូលមកពិនិត្យ ។
យោងតាមអគ្គស្នងការនគរបាលជាតិ បានឱ្យដឹងថាហេតុការណ៍នេះកើតឡើងនៅវេលាម៉ោង០២និង១៥នាទីព្រឹកថ្ងៃទី០៣ ខែតុលា ឆ្នាំ២០២០ នៅចំណុចលើដងផ្លូវ មុខផ្ទះលេខ២៤,២៦E0 ភូមិ៣ សង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ ។
បុរសខាងលើមិនទាន់ត្រូវបានស្គាល់អត្តសញ្ញាណសពសម្បុរស្រអែមមាឌស្ដើង កំពស់ប្រហែល១.៦០ម៉ែត្រ ។
តាមការបំភ្លឺឈ្មោះ ព្រុំច័ន្ទពិសិដ្ឋភេទប្រុសមុខរបររត់ម៉ូតូកងបី បានបំភ្លឺថាមុនពេលកើតហេតុ នៅថ្ងៃទី០៣ ខែតុលា ឆ្នាំ២០២០ វេលាម៉ោង០២និង១៥នាទី គាត់បានដឹកភ្ញៀវមកពីNAGA វិញក៏បានបើកម៉ូតូកង់បីមកឈប់នៅម្ដុំ ផ្លូវ១៣០កែងលេខ៥ ភូមិ០៣ សង្កាត់ផ្សារកណ្ដាលទី១ ខណ្ឌដូនពេញរាជធានីភ្នំពេញ រួចក៏បានដើរមកមុខផ្ទះលេខ២៤ និង២៦Eo ដើម្បីបត់ជើងតូច ។
ប្រភពបន្តថាពេលមើលទៅមុខក៏ស្រាប់តែឃើញជនរងគ្រោះ ហើយដើរទៅជិតរួចហៅជនរងគ្រោះ តែជនរងគ្រោះមិនឆ្លើយ។ពេលទៅមើលជិតបន្តិចទើបដឹងថាជនរងគ្រោះ បានចងក គាត់ក៏បានរត់ទៅប្រាប់មិត្តភក្តិនៅជិតនោះអោយជួយមើលនិងបានអោយមិត្តភ័ក្ដិរបស់ខ្ញុំទៅជួយរាយការណ៍ដល់សមត្ថកិច្ចដើម្បីចុះពិនិត្យកន្លែងកើតហេតុ ។ជនរងគ្រោះតែងតែ ផឹកស្រាជាប្រចាំនិងតែងតែត្អូញត្អែរថាគាត់ពិបាកចិត្ត ។
ក្រោយពីទទួលបានព័ត៌មានកម្លាំងជំនាញខណ្ឌនិងប៉ុស្តិ៍បានចុះដល់និងគ្រប់គ្រងកន្លែងកើតហេតុ ហើយរាយការណ៍ជូនព្រះរាជអាជ្ញានិងបានសហការជាមួយការិយាល័យបច្ចេកទេសវិឡាសាស្ត្រ ការិយាល័យព្រហ្មទណ្ឌកំរិតធ្ងន់និងពេទ្យអមសាលាដំបូងរាជធានីភ្នំពេញដើម្បីបង្កើត គណៈកម្មការធ្វើកោសល្យវិច័យពិនិត្យសាកសពនៅនិងកន្លែងកើតហេតុ។
ជាលទ្ធផលតាមការពិនិត្យរបស់ផ្នែកជំនាញបញ្ជាក់ថា ជនរងគ្រោះពិតជាស្លាប់ដោយចងក ដោយធ្វើអត្តឃាតខ្លួនឯង ពិតប្រាកដមែន ។
ក្រោយពីបញ្ចប់ការពិនិត្យខាងជំនាញបច្ចេកទេស បានប្រគល់សាកសពអោយទៅលោកនាយប៉ុស្តិ៍នគរបាលរដ្ឋបាលផ្សារកណ្ដាលទី១ ដើម្បីចាត់ចែងបន្ត(បច្ចុប្បន្នសពតម្កល់នៅវត្តឫស្សីសាញ់)។
ទិសដៅបន្តកំលាំងជំនាញខណ្ឌនិងប៉ុស្តិ៍បាននិងបន្តការស្រាវជ្រាវដើម្បីកំណត់អត្តសញ្ញាណនិងសាច់ញាតិ ៕
