ភ្នំពេញ៖ បើតាមរបាយការណ៍បឋមរបស់ រដ្ឋបាលខេត្តព្រះសីហនុ បានឲ្យដឹងថា ជំនន់ទឹកភ្លៀង ក្នុងស្រុកព្រៃនប់ កាលពីពាក់កណ្តាលអាធ្រាត្រ ថ្ងៃទី១៧ កញ្ញា ឈានចូលថ្ងៃទី១៨ កញ្ញា បានសម្រាប់ក្មេងស្រីអាយុ ១ខួបកន្លះម្នាក់ និងបណ្ដាលឲ្យលិចលង់ផ្ទះប្រជាពលរដ្ឋចំនួន ៤៧២គ្រួសារ ។
របាយការណ៍ដដែលបន្ថែមថា គិតត្រឹមម៉ោង ១០៖៣០ នាទីព្រឹក ថ្ងៃទី១៨ កញ្ញា ករណីខាងលើនេះ បណ្តាលឲ្យលិចលង់ប៉ះពាល់ ផ្ទះប្រជាពលរដ្ឋ សរុបចំនួន ៤៧២គ្រួសារ ក្នុងឃុំចំនួន៤ ជាប់ផ្លូវជាតិលេខ៤ នៅស្រុកព្រៃនប់ រួមមាន៖ ឃុំព្រៃនប់ចំនួន ១២៥គ្រួសារ មនុស្សចំនួន ៥០៦នាក់, ឃុំទួលទទឹងចំនួន ២៨៦គ្រួសារ មនុស្សចំនួន ១១៨០នាក់, ឃុំអណ្តូងថ្មចំនួន ៤៦គ្រួសារ មនុស្សចំនួន ១៨៨នាក់, ឃុំសំរ៉ុងចំនួន ១៥គ្រួសារ មនុស្សចំនួន ៨៤នាក់ ។
ជំនន់ទឹកភ្លៀងខាងលើនេះ ក៏បានសម្លាប់ក្មេងស្រីឈ្មោះ វុទ្ធី ស្រីនី អាយុ ១ខួបកន្លះ មានទីលំនៅក្នុងឃុំអណ្តូងថ្ម ។ ក្រៅពីនេះ នៅមានផ្ទះពលរដ្ឋតាមបណ្តាឃុំមួយចំនួនទៀត ក៏ទទួលរងផលប៉ះពាល់ខ្លះដែរ តែមិនមានធ្ងន់ធ្ងរដូចឃុំ ៤ ខាងលើនោះទេ ៕
