តុលាការ បង្គាប់ឲ្យចាប់ខ្លួន និងឃុំខ្លួន ប្រធានសភាពាណិជ្ជកម្មខេត្តចំនួន៣ និងកូនប្រុស ពាក់ព័ន្ធករណីឆបោកប្រាក់

ភ្នំពេញ៖ សាលាដំបូងរាជធានីភ្នំពេញ បានចេញដីកាបង្គាប់ឲ្យចាប់ខ្លួន និងឃុំខ្លួន លោក ហាក់ វណ្ណា ប្រធានសភាពាណិជ្ជកម្មខេត្តកំពត-តាកែវ-កែប និងកូនប្រុសឈ្មោះ ហាក់ ឈុនឌី ពាក់ព័ន្ធករណីឆបោកប្រាក់ ។

យោងតាមដីការបស់លោក ម៉ៅ ស៊ីណា ចៅក្រមជំនុំជម្រះនៃ សាលាដំបូងរាជធានីភ្នំពេញ កាលពពីថ្ងៃទី១៤ កញ្ញា បានឲ្យដឹងថា លោក ហាក់ វណ្ណា អាយុ៦០ឆ្នាំ មានទីលំនៅបច្ចុប្បន្នស្នាក់នៅផ្ទះលេខ៦១ ផ្លូវ៥០BT សង្កាត់បឹងទំពុនទី១ ខណ្ឌមានជ័យ រាជធានីភ្នំពេញ បានគេចខ្លួន បន្ទាប់ពីប្រព្រឹត្តបទល្មើស ហើយត្រូវបានតុលាការ សម្រេចផ្ដន្ទាទោសដាក់ពន្ធនាគារចំនួន ២ឆ្នាំ ដោយកំបាំងមុខ និងបង្គាប់ឲ្យចាប់ខ្លួន ពីបទ «ឆបោក» ប្រព្រឹត្តនៅរាជធានីភ្នំពេញ កាលពីខែកុម្ភៈ ឆ្នាំ២០១៦ បទល្មើសព្រហ្មទណ្ឌ ដែលមានចែងឲ្យផ្ដន្ទាទោសតាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ។ តាមពាក្យបណ្ដឹងរបស់ឈ្មោះ ស៊ុន សេងហ៊ាង ស្នាក់នៅផ្ទះភូមិខ សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។

ចៅក្រមជំនុំជម្រះ ក៏បានបង្គាប់ឲ្យកងកម្លាំងសាធារណៈស្រាវជ្រាវរកចាប់ និងនាំខ្លួនឈ្មោះ ហាក់ វណ្ណា ដែលមានអត្តសញ្ញាណ ដូចខាងលើនេះ ។ ព្រមទាំងបានបង្គាប់ឲ្យ ប្រធានមណ្ឌលអប់រំកែប្រែទី១ នៃក្រសួងមហាផ្ទៃ ទទួល និងឃុំខ្លួនជននេះរហូតដល់ មានសេចក្ដីសម្រេចផ្សេង។

ជាមួយគ្នានោះដែរ កាលពីថ្ងៃទី១៤ ខែកញ្ញា ឆ្នាំ២០២០ ចៅក្រមជំនុំជម្រះ ម៉ៅ ស៊ីណា ក៏បានចេញដីកាបញ្ឈប់ការចាប់ខ្លួន លោក ហាក់ វណ្ណា និងឈ្មោះ ហាក់ ឈុនឌី វិញផងដែរ ដោយហេតុថាបុគ្គលនេះបានប្ដឹងជំទាស់ នឹងសាលក្រមតុលាការ ៕