ភ្នំពេញ៖ អតីតតារាចម្រៀង Rock លោក ពៅ ពេជ្រ បានមកចាប់អាជីពជាតារាចម្រៀងឯករាជ្យបែប Original Song ដោយបានបញ្ចេញបទចម្រៀងល្បីពីរទៅហើយ បូករួមទាំងបទចម្រៀងចុងក្រោយក្រោមចំណងជើងថា «កញ្ញាធ្មេញដែក» ដោយចេញ MV ជាផ្លូវការទាំងស្រុងនៅថ្ងៃទី៦ ខែតុលា ឆ្នាំ២០១៨ ជាមួយសកម្មភាពឡូយកប់តែម្តង ដើម្បីអបអរពិធីភ្ជំបិណ្ឌ។
«កញ្ញាធ្មេញដែក» ជាបទចម្រៀង Original Song ដែលបានសម្រិតសម្រាំងធ្វើដោយតារាចម្រៀង ពៅពេជ្រ ដើម្បីត្រៀមសម្រាប់អបអរកម្មវិធីបុណ្យភ្ជុំបិណ្ឌ គ្រាន់តែលឺភ្លាមញ័រជើងចង់រាំតែម្តង ។
លោក ពៅពេជ្រ បានប្រាប់ Obnasia ថា បទចម្រៀង «កញ្ញាធ្មេញដែក» នេះបានចេញជាផ្លូវការហើយនៅថ្ងៃនេះ ដោយបទនេះ បានធ្វើឡើង ដើម្បីអបអរពិធីបុណ្យភ្ជុំបិណ្ឌរបស់ខ្មែរយើង។ តារាចម្រៀង Original Song រូបនេះបានប្រាប់ថា បទនេះធ្វើឡើងដើម្បីចូលរួមកាត់បន្ថយ ចង្វាក់បែកស្លុយ ហើយបទនេះដែរ អាចរាំគ្រប់រដូវកាលតែម្តង ។
ងាកមកកាន់ Full MV ទាំងស្រុងមានសកម្មភាពរស់រវើកជាមួយបទភ្លេងកន្ទ្រាក់ចាប់អារម្មណ៍ពីទស្សនិកជន ដែលគាំទ្ររូបលោក ។
អតីតតារាចម្រៀង Rock រូបនេះបានបន្តថា លោកក៏សូមអរគុណដល់ម្ចាស់ស្ព័នស័រ ដែលបានឧបត្ថម្ភបទចម្រៀងរបស់លោក ហើយក៏សូមឲ្យម្ចាស់ឧបត្ថម្ភរកស៊ីទទួលទានមានបាន ហើយក៏ជូនពរដល់ប្រជាជនកម្ពុជាទាំងអស់សូមឲ្យប្រុងប្រយ័ត្ន ក្នុងការធ្វើដំណើរជិតឆ្ងាយនារដូវភ្ជុំបិណ្ឌ នេះ ។
គួរបញ្ជាក់ផងដែរថា បទ«កញ្ញាធ្មេញដែក» ជាបទចម្រៀងទី២ របស់ពៅពេជ្រ បន្ទាប់ពីបទ «អាកូនពូជ» ដែលទទួលបានការគាំទ្រយ៉ាងខ្លាំងនាពេលកន្លងមកនោះ ៕
សូមទស្សនាបទចម្រៀង «កញ្ញាធ្មេញដែក» ដូចខាងក្រោមនេះ៖
