ភ្នំពេញ៖ យោធាកូរ៉េខាងត្បូងបាននិយាយថា ប្រទេសកូរ៉េខាងជើងបានកាត់ផ្តាច់ខ្សែបណ្តាញអគ្គិសនីដែលដំឡើងដោយប្រទេសកូរ៉េខាងត្បូង ដើម្បីផ្គត់ផ្គង់អគ្គិសនីដល់សួនឧស្សាហកម្មរួមនៅក្នុងតំបន់កេសុង ដែលឥឡូវនេះត្រូវបានបិទស្ថិតនៅព្រំដែនកូរ៉េខាងជើង ជាវិធានការចុងក្រោយរបស់ទីក្រុងព្យុងយ៉ាងក្នុងការផ្តាច់ទំនាក់ទំនងអន្តរកូរ៉េ។
ក្រុមមន្ត្រីបាននិយាយថា ទាហានកូរ៉េខាងជើងបានដកផ្នែកខ្លះនៃខ្សែថាមពលតភ្ជាប់ទៅកាន់ប៉មបញ្ជូនដែលត្រូវបានសាងសង់នៅតាមបណ្តោយផ្លូវយ៉ុងហ្គី ដែលហាក់ដូចជាការរៀបចំដើម្បីកម្ទេចប៉មបញ្ជូនដែលសាងសង់ដោយប្រទេសកូរ៉េខាងត្បូង។ អ្នកនាំពាក្យអគ្គសេនាធិការចម្រុះ លោក លី ស៊ុងជុន (Lee Sung-jun) បានប្រាប់សន្និសីទសារព័ត៌មានថា «ប្រទេសកូរ៉េខាងជើងមិនទាន់ធ្វើការលើប៉មបញ្ជូននោះទេ។ ទាហានកូរ៉េខាងជើងបានគៀបខ្សែបណ្តាញដែលមានតង់ស្យុងខ្ពស់ឱ្យធ្លាក់មកលើដី»។
លោក លី បាននិយាយថា ទាហានកូរ៉េខាងជើងបានកាត់ផ្តាច់ខ្សែថាមពលដែលភ្ជាប់ទៅនឹងប៉មបញ្ជូនទីមួយដែលស្ថិតនៅភាគខាងជើងនៃខ្សែបន្ទាត់ព្រំដែនយោធា ដោយលោកបានបន្ថែមថា យើងត្រូវការការត្រួតពិនិត្យបន្ថែមទៀត។ ប្រទេសកូរ៉េខាងត្បូងបានសាងសង់ប៉មបញ្ជូនចំនួន ៤៨ប៉ម ដែលមានទីតាំងនៅភាគខាងជើង ដើម្បីផ្គត់ផ្គង់អគ្គិសនីដល់បរិវេណសួនឧស្សាហកម្មកេសុង ដែលឥឡូវនេះត្រូវបានបិទ។ កាលពីខែមុន ប្រទេសកូរ៉េខាងជើងបានបំផ្ទុះផ្លូវទាំងពីរបន្ទាប់ពីយោធារបស់ខ្លួនបានប្រកាសពីផែនការបំបែកទឹកដីកូរ៉េខាងជើងទាំងស្រុងពីកូរ៉េខាងត្បូង៕
