បរទេស៖ អ្នកនាំពាក្យក្រសួងការពារជាតិចិនបាននិយាយថា យោធាចិន និងសិង្ហបុរី នឹងរៀបចំសមយុទ្ធយោធារួមគ្នាឆ្នាំ២០២៤ នៅក្នុងខេត្តហេណាន ភាគ កណ្តាលប្រទេសចិន នៅចុងខែវិច្ឆិកា។
លោក ហ្សាង សៅហ្គាង (Zhang Xiaogang) អ្នកនាំពាក្យក្រសួងការពារជាតិ បាននិយាយថា សមយុទ្ធនាពេលខាងមុខដែលនឹងផ្តោតលើប្រតិបត្តិការប្រឆាំងអំពើភេរវកម្មរួមគ្នាក្នុងទីក្រុង នឹងត្រូវធ្វើឡើងតាមផែនការប្រចាំឆ្នាំ និងការឯកភាពរបស់ភាគីទាំងពីរ។
អ្នកនាំពាក្យបាននិយាយថា សមយុទ្ធនេះមានគោលបំណងធ្វើឱ្យស៊ីជម្រៅកិច្ចសហប្រតិបត្តិការជាក់ស្តែងរវាងយោធាទាំងពីរ និងពង្រឹងសមត្ថភាពរបស់ពួកគេក្នុងប្រតិបត្តិការប្រឆាំងអំពើភេរវកម្មរួមគ្នា។
លោក ហ្សាង បាននិយាយថា ការហ្វឹកហ្វឺនកងទ័ពរួមគ្នានៃកិច្ចសហប្រតិបត្តិការសមយុទ្ធ គឺជាគម្រោងកិច្ចសហប្រតិបត្តិការដែលបានបង្កើតឡើងរវាងយោធាទាំងពីរ៕
