បរទេស៖ យោងតាមសេវាសារព័ត៌មានរបស់ប្រធានាធិបតីបានឱ្យដឹងថា ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelensky) បានជួបជាមួយរដ្ឋលេខាធិការក្រសួងការពារជាតិសហរដ្ឋអាមេរិក លោក ឡយដ៍ អូស្ទីន (Lloyd Austin) ដើម្បីពិភាក្សាអំពីបញ្ហាការពារជាតិក្នុងអំឡុងពេលកិច្ចប្រជុំរបស់ពួកគេ។
កិច្ចពិភាក្សាបាននិយាយនឹងសំណើរបស់អ៊ុយក្រែនក្នុងការប្រើប្រាស់អាវុធរយៈចម្ងាយឆ្ងាយដើម្បីវាយប្រហារគោលដៅយោធានៅក្នុងប្រទេសរុស្ស៊ី។
លោក ហ្សេលេនស្គី និងលោក អូស្ទីន ក៏បាននិយាយផងដែរអំពីការបង្កើនការផលិតយន្តហោះគ្មានមនុស្សបើក មីស៊ីលធ្វើដំណើរ គ្រាប់កាំភ្លើងធំ និងឧបករណ៍ការពារអាកាស។
លោក អូស្ទីន បានប្រកាសកញ្ចប់ជំនួយយោធាថ្មីរបស់សហរដ្ឋអាមេរិកសម្រាប់អ៊ុយក្រែនដែលមានតម្លៃ ៤០០លានដុល្លារអាម៉េរិក ដែលរួមមានគ្រាប់រំសេវ ឧបករណ៍យោធា និងអាវុធ។
ចាប់តាំងពីខែកុម្ភៈឆ្នាំ២០២២ សហរដ្ឋអាមេរិកបានផ្តល់ជំនួយយោធាចំនួន ៦៤,១ប៊ីលានដុល្លារអាម៉េរិកដល់អ៊ុយក្រែន។ នេះបើយោងតាមការចេញផ្សាយដោយក្រសួងការបរទេសសហរដ្ឋអាមេរិកនៅក្នុងខែតុលាឆ្នាំនេះ៕
