បរទេស៖ ទីភ្នាក់ងារទិញសព្វាវុធរបស់ប្រទេសកូរ៉េខាងត្បូងបាននិយាយកាលពីថ្ងៃពុធថា ខ្លួនកំពុងស្វែងរកការបង្កើតទីតាំងបាញ់បង្ហោះគ្រាប់រ៉ុក្កែតយោធានៅលើដី ដើម្បីសម្រួលដល់ការបាញ់បង្ហោះផ្កាយរណបនាពេលអនាគត។
រដ្ឋបាលកម្មវិធីការទិញយកការពារជាតិ (DAPA) បានបង្ហាញផែនការនេះនៅក្នុងរបាយការណ៍គោលនយោបាយទៅកាន់ប្រធានាធិបតី លោក យូន ស៊ុកយុល (Yoon Suk Yeol) ខណៈដែលយោធាគ្រោងនឹងបាញ់បង្ហោះ ផ្កាយរណបឈ្លបយកការណ៍ខ្នាតតូចរាប់សិបគ្រឿងនៅឆ្នាំ២០៣០ បន្ថែមពីលើផ្កាយរណបចារកម្មដំបូងរបស់ខ្លួន ដែលបានបង្ហោះកាលពីឆ្នាំមុន។
មន្ត្រីរដ្ឋបាល DAPA ម្នាក់បានប្រាប់អ្នកយកព័ត៌មានក្នុងលក្ខខណ្ឌសុំមិនបញ្ចេញឈ្មោះថា ខណៈដែលយោធាបច្ចុប្បន្នកំពុងប្រតិបត្តិការទីតាំងបាញ់បង្ហោះតាមដែនសមុទ្រ ដែលមានដែនកំណត់ ដោយសារលក្ខខណ្ឌអាកាសធាតុនៅសមុទ្រ និងកត្តាផ្សេងៗទៀត។
ប្រទេសកូរ៉េខាងត្បូង បានបាញ់បង្ហោះផ្កាយរណបចារកម្មយោធាជនជាតិដើមដំបូងដោយជោគជ័យ ពីមូលដ្ឋានយោធាសហរដ្ឋអាមេរិកក្នុងរដ្ឋកាលីហ្វ័រញ៉ា កាលពីខែធ្នូឆ្នាំមុន ដែលជាផ្នែកនៃគម្រោងដាក់ផ្កាយរណបឈ្លបយកការណ៍ខ្នាតមធ្យមចំនួន ៥គ្រឿង នៅក្នុងគន្លងតារាវិថីនៅឆ្នាំ២០២៥។
ទន្ទឹមនឹងនេះ ទីភ្នាក់ងារនេះបាននិយាយថា ខ្លួនមានបំណងចង់ប្រទេសនេះ ទទួលបានការនាំចេញផ្នែកការពារជាតិចំនួន ២០ប៊ីលានដុល្លារអាម៉េរិកនៅឆ្នាំនេះ បន្ទាប់ពីបាននាំចេញអាវុធមានតម្លៃប្រហែល ១៤ប៊ីលានដុល្លារអាម៉េរិកកាលពីឆ្នាំមុន។
នៅឆ្នាំ២០២២ ប្រទេសកូរ៉េខាងត្បូងបានបង្ហាញពីគោលដៅ ក្លាយជាប្រទេសនាំចេញផ្នែកការពារជាតិធំជាងគេទី៤ របស់ពិភពលោកនៅឆ្នាំ២០២៧ បន្ទាប់ពីក្រុមហ៊ុនការពារជាតិក្នុងស្រុកបានកាន់កាប់កិច្ចព្រមព្រៀងអាវុធសំខាន់ៗជាបន្តបន្ទាប់ជាមួយប្រទេសប៉ូឡូញ។ នៅឆ្នាំនោះ ប្រទេសនេះបាននាំចេញទំនិញការពារជាតិមានតម្លៃ ១៧ប៊ីលានដុល្លារអាម៉េរិក៕
ប្រភព៖ AKP
