បរទេស៖ ក្រសួងការពារជាតិរបស់ទីក្រុងសេអ៊ូលបាននិយាយថា កូរ៉េខាងត្បូង និងសហរដ្ឋអាមេរិកបានធ្វើសមយុទ្ធដែនអាកាសរួមគ្នាកាលពីថ្ងៃពុធ ដោយមានការចូលរួមពីយន្តហោះទម្លាក់គ្រាប់បែកយុទ្ធសាស្ត្រប៊ី-៥២អេច (B-52H) របស់សហរដ្ឋអាមេរិកចំនួន ២គ្រឿងនៅលើសមុទ្រលឿង នៅក្នុងការបង្ហាញកម្លាំងចុងក្រោយប្រឆាំងនឹងកូរ៉េខាងជើង។
ក្រសួងបាននិយាយថា យន្តហោះចម្បាំងអេហ្វ-៣៥អេ (F-35A) យន្តហោះចម្បាំងអេហ្វ-១៥ខេ (F-15K) របស់កូរ៉េខាងត្បូង និងយន្តហោះចម្បាំងអេហ្វ-៣៥ប៊ី (F-35B) និងយន្តហោះចម្បាំងអេហ្វ-១៦ (F-16) របស់សហរដ្ឋអាមេរិក បានអមដំណើរយន្តហោះទម្លាក់គ្រាប់បែកដែលមានសមត្ថភាពនុយក្លេអ៊ែរក្នុងអំឡុងពេលសមយុទ្ធ ខណៈដែលសម្ព័ន្ធមិត្តស្វែងរកការពង្រឹងកិច្ចសហប្រតិបត្តិការសន្តិសុខប្រឆាំងនឹងការគំរាមកំហែងផ្នែកយោធារបស់កូរ៉េខាងជើងដែលកំពុងកើនឡើង។
សមយុទ្ធនេះបានកត់សម្គាល់ពីការវិលត្រឡប់មកវិញនៃទ្រព្យសម្បត្តិយោធារបស់សហរដ្ឋអាមេរិកដ៏សំខាន់នៅឧបទ្វីបក្នុងរយៈពេលតិចជាងមួយខែ បន្ទាប់ពីវាបានធ្វើការចុះចតជាលើកដំបូងមិនធ្លាប់មាននៅឯមូលដ្ឋានទ័ពអាកាសកូរ៉េខាងត្បូងកាលពីថ្ងៃទី១៧ ខែតុលាកន្លងទៅ។
ជាមួយនឹងសមយុទ្ធចុងក្រោយនេះ ប្រទេសកូរ៉េខាងត្បូង និងសហរដ្ឋអាមេរិក បានធ្វើសមយុទ្ធដែនអាកាសរួមគ្នាចំនួន ៧លើក ដែលពាក់ព័ន្ធនឹងយន្តហោះទម្លាក់គ្រាប់បែកប៊ី-៥២អេច នៅលើឧបទ្វីបក្នុងឆ្នាំនេះ។ ពួកគេបានធ្វើសមយុទ្ធចំនួន ១២លើកនៅក្នុងឆ្នាំនេះ ជាមួយនឹងយន្តហោះទម្លាក់គ្រាប់បែកយុទ្ធសាស្ត្ររបស់សហរដ្ឋអាមេរិកសរុប រួមទាំងយន្តហោះទម្លាក់គ្រាប់បែកប៊ី-១ប៊ី (B-1B)។
កាលពីថ្ងៃច័ន្ទ លោក អូស្ទីន ក៏បានសាទរផងដែរនូវការចុះចតជាលើកដំបូងរបស់យន្តហោះ ប៊ី-៥២ នៅក្នុងប្រទេសកូរ៉េខាងត្បូង ដោយលោកបាននិយាយថា វាជា «ព្រឹត្តិការណ៍សំខាន់» សម្រាប់កិច្ចខិតខំប្រឹងប្រែងរារាំងរបស់សហរដ្ឋអាមេរិក ហើយបានបង្ហាញពី «ក្រុមប្រយុទ្ធរបស់នាវាមួយផ្សេងទៀតដែលនឹងមកដល់ក្នុងពេលឆាប់ៗនេះ»៕
ប្រភព៖ AKP
