បរទេស៖ ក្រសួងការពារជាតិរបស់ទីក្រុងសេអ៊ូលបាននិយាយថា កូរ៉េខាងត្បូង សហរដ្ឋអាមេរិក និងជប៉ុន បានព្រមព្រៀងគ្នាកាលពីថ្ងៃអាទិត្យដើម្បីដាក់ឱ្យដំណើរការប្រព័ន្ធចែករំលែកទិន្នន័យព្រមានមីស៊ីលតាមពេលវេលាជាក់ស្តែងនៅខែក្រោយ ដើម្បីស្វែងរក និងវាយតម្លៃការបាញ់មីស៊ីលផ្លោងរបស់កូរ៉េខាងជើងឱ្យកាន់តែប្រសើរឡើង។
ប្រមុខការពារជាតិនៃប្រទេសទាំង៣ បានឈានដល់កិច្ចព្រមព្រៀងក្នុងអំឡុងពេលកិច្ចប្រជុំរបស់ពួកគេក្នុងឱកាសនៃដំណើរទស្សនកិច្ចរបស់លោក ឡយដ៍ អូស្ទីន រដ្ឋមន្ត្រីក្រសួងការពារជាតិសហរដ្ឋអាមេរិកទៅកាន់ទីក្រុងសេអ៊ូលសម្រាប់កិច្ចពិភាក្សាសន្តិសុខទ្វេភាគីប្រចាំឆ្នាំជាមួយសមភាគីកូរ៉េខាងត្បូង លោក ស៊ីន វុនស៊ីក ដែលបានគ្រោងធ្វើនៅថ្ងៃចន្ទនេះ និងរដ្ឋមន្ត្រីការពារជាតិជប៉ុន លោក មីណូរូ គីហារ៉ា ចូលរួមសម័យប្រជុំត្រីភាគីតាមរយៈតំណភ្ជាប់វីដេអូ។
ក្រសួងបាននិយាយនៅក្នុងសេចក្តីប្រកាសមួយថា «រដ្ឋមន្ត្រីនៃប្រទេសទាំង៣ បានវាយតម្លៃថា ការត្រៀមរៀបចំសម្រាប់យន្តការចែករំលែកពេលវេលាជាក់ស្តែង ដែលមានគោលបំណងពង្រឹងសមត្ថភាពរបស់ប្រទេសនីមួយៗក្នុងការរកឃើញ និងវាយតម្លៃគ្រាប់មីស៊ីលរបស់កូរ៉េខាងជើងនាពេលបច្ចុប្បន្នកំពុងស្ថិតក្នុងដំណាក់កាលចុងក្រោយ។ ពួកគេបានព្រមព្រៀងបើកយន្តការនេះជាផ្លូវការនៅក្នុងខែធ្នូខាងមុខ»។
ក្នុងជំនួបនោះ រដ្ឋមន្ត្រីទាំង៣ បានថ្កោលទោសទៅលើសកម្មភាពបាញ់គ្រាប់មីស៊ីល និងនុយក្លេអ៊ែរចុងក្រោយរបស់ទីក្រុងព្យុងយ៉ាង ហើយបានសន្យាថានឹងសហការគ្នាឱ្យបានយ៉ាងជិតស្និទ្ធសម្រាប់គោលដៅរួមរបស់ពួកគេនៃ «ការលុបបំបាត់អាវុធនុយក្លេអ៊ែរទាំងស្រុង» របស់កូរ៉េខាងជើងស្របតាមដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ។
កូរ៉េខាងជើងបានបាញ់សាកល្បងមីស៊ីលអន្តរទ្វីបឥន្ធនៈរឹងវ៉ាសុង-១៨ (Hwasong-18) ចំនួន ២គ្រាប់កាលពីដើមឆ្នាំនេះ ហើយត្រូវបានគេជឿថា កំពុងរៀបចំបាញ់បង្ហោះផ្កាយរណបចារកម្មយោធាដំបូងរបស់ខ្លួនបន្ទាប់ពីការប៉ុនប៉ងបរាជ័យកាលពីក្នុងខែឧសភា និងខែសីហាកន្លងមក៕
ប្រភព៖ AKP
