បរទេស៖ ក្រសួងឧស្សាហកម្មរបស់កូរ៉េខាងត្បូងបាននិយាយកាលពីថ្ងៃអាទិត្យថា ការនាំចេញរបស់កូរ៉េខាងត្បូងបានធ្លាក់ចុះក្នុងរយៈពេល ១២ខែជាប់ៗគ្នានៅក្នុងខែកញ្ញា ប៉ុន្តែបានធ្លាក់ចុះតិចតួចបំផុតពីមួយឆ្នាំទៅមួយឆ្នាំមកទល់ពេលនេះ ដោយសារតែតម្រូវការសកលសម្រាប់សម្ភារៈអគ្គីសនីបានកំពុងស្ថិតនៅលើផ្លូវងើបឡើងវិញ។
ការនាំចេញទៅក្រៅប្រទេសបានធ្លាក់ចុះ ៤,៤% កាលពីឆ្នាំមុនមកត្រឹម ៥៤,៦៦ប៊ីលានដុល្លារកាលពីខែមុន។ នេះបើយោងតាមទិន្នន័យដែលចងក្រងដោយក្រសួងពាណិជ្ជកម្ម ឧស្សាហកម្ម និងថាមពល។
ទោះបីជាការនាំចេញធ្លាក់ចុះក៏ដោយ ក៏ប្រទេសនេះបានចូលអតិរេកពាណិជ្ជកម្មចំនួន ៣,៧ប៊ីលានដុល្លារក្នុងខែកញ្ញា ដែលជាបរិមាណដ៏ធំបំផុតក្នុងរយៈពេលពីរឆ្នាំ និងជាការកើនឡើងជាប់ៗគ្នាលើកទី៤ ដោយសារការនាំចូលមានការថយចុះយ៉ាងខ្លាំង។
ក្រសួងបាននិយាយថា ការនាំចូលបានធ្លាក់ចុះ ១៦,៥% កាលពីឆ្នាំមុនមកត្រឹម ៥០,៩៦ប៊ីលានដុល្លារកាលពីខែមុន ខណៈដែលការនាំចូលថាមពលបានធ្លាក់ចុះ ៣៦% កាលពីឆ្នាំមុន។ប្រទេសកូរ៉េខាងត្បូងពឹងផ្អែកលើការនាំចូលសម្រាប់តម្រូវការថាមពលភាគច្រើនរបស់ខ្លួន។
រដ្ឋមន្ត្រីក្រសួងឧស្សាហកម្ម លោក បាង មូនយូ បាននិយាយថា «ការនាំចេញបានបង្ហាញពីសញ្ញានៃភាពប្រសើរឡើង និងអាចស្ទុះងើបឡើងវិញ ទោះបីជាយើងកំពុងប្រឈមមុខនឹងលក្ខខណ្ឌខាងក្រៅដែលមិនអំណោយផល ដូចជាអត្រាការប្រាក់ខ្ពស់ ការធ្លាក់ចុះសេដ្ឋកិច្ចនៅក្នុងប្រទេសចិន និងបញ្ហាខ្សែសង្វាក់ផ្គត់ផ្គង់ក៏ដោយ»៕
ប្រភព៖ ទីភ្នាក់ងារសារព័ត៌មានកម្ពុជា
