បរទេស៖ អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បាននិយាយនៅក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ថា អង្គការណាតូដែលពង្រីកឈានឆ្ពោះទៅតំបន់អាស៊ីប៉ាស៊ីហ្វិកនឹងធ្វើឱ្យស្ថិរភាពនៅទីនោះកាន់តែអាក្រក់ទៅៗ។
ឆ្លើយតបទៅនឹងសំណើរបស់សារព័ត៌មានតាសស៍ ដើម្បីធ្វើអត្ថាធិប្បាយទៅលើផែនការរបស់អង្គការណាតូក្នុងការបើកការិយាល័យនៅក្នុងប្រទេសជប៉ុន លោកស្រីបាននិយាយថា «ការបន្តពង្រីកទៅទិសខាងកើតរបស់អង្គការណាតូទៅកាន់តំបន់អាស៊ីប៉ាស៊ីហ្វិក និងការជ្រៀតជ្រែករបស់សម្ព័ន្ធភាពក្នុងកិច្ចការតំបន់ នឹងធ្វើឱ្យខូចខាតដល់សន្តិភាព និងស្ថិរភាពដោយជៀសមិនរួច»។
អ្នកការទូតរូបនោះបានសង្កត់ធ្ងន់ថា «តំបន់អាស៊ីមិនគួរក្លាយជាសង្វៀននៃការប្រកួតប្រជែងភូមិសាស្ត្រនយោបាយនោះទេ»។
លោកស្រី ម៉ៅ នីង បាននិយាយបន្ថែមថា ការឈានទៅមុខរបស់អង្គការណាតូនៅតំបន់អាស៊ី «នឹងធ្វើឱ្យមានការប្រឈមមុខដាក់គ្នានៅក្នុងប្លុក ដែលវាជារឿងគួរឱ្យព្រួយបារម្ភជាពិសេសរបស់បណ្តាប្រទេសក្នុងតំបន់»។
កាលពីថ្ងៃទី៣ ខែឧសភា សារព័ត៌មាន Nikkei បានរាយការណ៍ថា អង្គការណាតូគ្រោងនឹងបើកការិយាល័យទំនាក់ទំនងរបស់ខ្លួននៅប្រទេសជប៉ុននៅឆ្នាំក្រោយ។
យោងតាមសារព័ត៌មាននេះបានឱ្យដឹងថា «ការិយាល័យនេះនឹងអនុញ្ញាតឱ្យសម្ព័ន្ធភាពយោធាធ្វើការពិគ្រោះយោបល់តាមកាលកំណត់ជាមួយប្រទេសជប៉ុន និងដៃគូសំខាន់ៗនៅក្នុងតំបន់ ដូចជាកូរ៉េខាងត្បូង អូស្ត្រាលី និងនូវែលសេឡង់»។
សារព័ត៌មា Nikkei បាននិយាយថា សេចក្តីសម្រេចជាផ្លូវការគួរតែធ្វើឡើងមុនពេលកិច្ចប្រជុំកំពូលអង្គការណាតូនៅទីក្រុង Vilnius នៅថ្ងៃទី១១-១២ ខែកក្កដា៕
ប្រភព៖ ក្រសួងព័ត៌មាន
